|
Azalpenak Aurki zer den Aurki direktorio bat da, link edo lotura euskaldunen bilduma konpleto bat, bilatzaile hierarkiko bat, gutxi gora-behera, Dmoz bilatzailearen baliabide teknikoak erabiliz eraikia. Gaztelaniaz Olé edo ingelesez Yahoo izan daitezkeenaren kidekoa. Guneei buruzko azalpenak euskaraz daude direktorio honetan. Markatutako web orri gehienak euskaraz daude, euskara hutsez, edo elebidun edo eleanitzak izanik, tartean euskara ere badela. Euskaldunentzat interes berezia duten erdarazko euskal web batzuk ere ageri dira direktorioan, baina saiatzen gara gutxi izan daitezen. Bakarrik esanguratsuak iruditzen zaizkigun web erdaldunak jarri ditugu, eta saiatu gara horietan (erd.) izeneko marka ezartzen. Horrek (erd.) esan nahi du orria erdaraz dagoela, baina ez euskaraz. Ez bakarrik gaztelaniaz: gogoratu frantsesa eta ingelesa ere erdara direla. Direktorioak baditu, bestalde ingelesezko, frantsesezko eta espainolezko atal batzuk Euskal Herriari dagozkionak. Hizkuntza horietan idatzitako web orriek atal horietan dute toki naturala. Zuk zeuk edozein eduki gehitu nahi baduzu, aurki ezazu egokia den atala, eta Lotura bat gehitu dioen tokian klikatu eta, egin zure proposamena.. Gune eleanitzek tokia dute ODPko kategoria desberdinetan, hizkuntza bakoitzaren arabera. Hala ere, normala izaten da euskarazko bertsioa ere baduten guneen kasuan, sarrera orria erdaraz izatea, eta beste klik bat egin behar izatea euskarazko menura joateko. Gu saiatzen gara hori konpontzen, zuzenean euskarazko orri nagusirako lotura eskaintzen. Esate baterako, bilatzaile arruntek Irungo Udalarentzat helbide hau emango dizuete: <http://www.irun.org>. Bilatzaile hau erabilita, ordea, <http://www.irun.org/bin/einicio.asp> euskarazko orri nagusira eramango zaitugu. Beste erraztasun bat ere eskaintzen dio erabiltzaile euskaldunari Aurki-k. Deklinabidea kontuan hartzen du hemen inplementatu dugun konponbide teknikoak. 'Bizkaia' bilatzen baduzu, 'Bizkaiko mendiak' aipatzen dituen gunea ere aurkituko duzu. 'Hondartzak' bilatu, eta 'Hondartzetako egoera' ere aurkituko duzu. Nazioarteko proiektu eleanitza Euskarazko bilatzaile-direktorio bat da hau, baina nazioarteko edukiak edo beste hizkuntza batekoak aurkitzeko ere oso aukera ona da Aurki. ODP osoa dago integratuta tresna honetan, ez bakarrik euskarazko atala. Horregatik, bilatzailearen edozein puntutan Beste hizkuntzetan bilatzeko aukera ematen badiozu, halaxe bilatuko dizu makinak. Direktorioan zehar beste hizkuntzetan nabigatzeko aukera ere izango duzu, finlandieraz adibidez: /World/Suomi/ edo Java lengoaiari buruzko atalean: Computers/Programming/Languages/Java/, edo zuk nahiago duzun informazio multzoan... Era berean, hemen mundu guztiko lotura horien berri aurkituko duzun bezala, beste gune askotan ere agertzen dira, berdin-berdin, euskarazko edukiak. Aurki-ko edukiak mundu guztiko hainbat zerbitzutan aurkitzen ahal dira, hala nola Euroseek edo Google bezalako proiektu garrantzitsuetan, edo izaera xelebreagoa izan dezaketen beste batzuetan... Aurki-ko edukiak Google-n agertzea bereziki garrantzitsua da. Direktorioaren agerpenaz gain, Aurki agertzen den guneko edukiak goitik-behera arakatzen ditu Googlek, eta, hortaz, euskarazko edukiak Interneten ikustarazteko modurik errazena da Aurki-n gehitzea, horren bidez lortzen duzulako, besteak beste, posizio on bat une honetan munduko onena den bilatzaile horretan, Google-n. |
|
|
|||||||||
|
| zOpen Directory software programarekin egina. Ingenieritza eta diseinua: CodeSyntax. |
 |
Eibar.ORG elkarteak Eibarko Udala eta Gipuzkoako Foru Aldundiaren laguntzaz. |
 |