Gaztelupeko Hotsak

independent record label

ABY-KEM: Debagoienako metalaren harrobia

Zerbait berria asmatzeko itsutasuna eta gaur egungo tendentziak alboratuta, Aby-Kem bergararrak metalaren erraietara jo dute zuzenean. 90eko hamarkadako thrash talde autentiko eta esanguratsuenen arima barneratu eta propio egitea lortu dute. Horri, gainera, death ukituak batu dizkiote, eta emaitza teknika oso landuarekin zizelkatutako indar eta amorruz betetako basamortuko ekaitza da. Azken guda da beren aurkezpen diskoa.  2007/12/20 - 00:49:20

HARRIET TUBMAN: Jazz-Rockaren gordintasuna New Yorketik

HARRIET TUBMAN taldeak esklabotzatik ihes egiteko bere bizia arriskuan ipini zuen eta beste 300 laguni gauza bera egiten lagundu zien heroi afro-amerikarrari zor dio bere izena. Askatasunaren idealetatik edanda, HARRIET TUBMAN taldearen musika arimaren barnean sartzen da musikaren adierazpen askearen bila. Ornette Coleman, Jimi Hendrix, Derrick May, Art Ensemble of Chicago eta Parliament/ Funkadelic bezalako artisten proposamen berritzaileen –nola kontzeptuaren hala musikaren aldetik– luzapena da talde honen musika. Aste honetan Euskal Herrian arituko dira zuzenean  2007/12/13 - 00:23:25

SURFIN KAOS

Tryphyllon disko berrian, Surfin kaos donostiarrek 70eko eta 80ko hamarkadetako punk, garage eta hard-rock talde ingeles eta amerikarren eraginak eta soinua bereganatzen dituzte (norberak aukera ditzala izenak): kantu zuzenak, riff gitarra sarkorrak eta bakarraldi biziak, erritmo sendo eta bortitzak, melodia itsaskorrak, ozen abesteko leloak... Haatik, bilakaera nabarmena da hamahiru kantu berri hauetan, abestiak biribilagoak eta ñabardurez beteagoak dira, pop arrastoak desagertu egin dira eta gogortu egin dira erritmoak eta gitarrak. Bi hitzordu dizuzte diskoa aurkezteko: - Azaroak 30ean Donostiako Bukowskin, goizez eta - Abenduak 6an Durangoko Plateruenean, gauez  2007/11/28 - 23:35:12

KOKEIN: kantu berriak eta irudi zaharrak

Mundu margotu berri bat Eibarko taldearen hirugarren lan diskografikoa da, beste aurrerapauso bat orain dela bost urte Kokein EP-arekin hasitako ibilbide laburrean. DVD batez lagunduta dator diskoa. 2006ko hasieran emandako kontzertu akustikoetatik Elgetako Espaloian kafe antzokian eskainitakoa jasotzen du, eta bertan, Maite Arroitajauregi biolontxelo jotzailea lagun izan zuen Kokeinek. Bere kantu propioez gain, Radiohead taldearen Street spirit (fade out) kantuaren moldaketa jasotzen da.  2007/11/22 - 20:14:10

MAMBA BEAT : dantzarako proposamen mestizoa

Bilboko musikariek osatzen dute, batzutan seikotea bihurtzen den, Mamba Beat laukotea. Programazio elektronikoak euskarri, jazza, funkya eta musika beltzean oinarritutako musika lantzen dute. Dantzarako gonbitea da bere proposamena groove, acid, tekno edo soul erritmoen bitartez. Asteazkenean, hilak 21, kaleratuko dute estreineko diskoa eta ostiralean, azaroak 23an , zuzenean arituko dira Bilborock-en aurkezpen berezia eginez. Musikariak Cherry Boppers, Ska-P, Txuma Murugarren, Lovercraft, Doctor Deseo, Soul Bussiness...moduko taldeetan ibilitakoak dira.  2007/11/19 - 01:00:09

LAS MEMBRANAS+LOS CREYENTES+SARRIS ROCK TRIO. BLOODY HOTSAK PARTY-Azaroak 17an Tunk Aretoan-IRUN

Jaia larunbatean izango da, Irungo Tunk aretoan eta bertan hiru talde arituko dira: Sarris trio rockanroleroa eta ondoren zigiluaren bigarren erreferentzia aurkezten duten bi taldeak: Los Creyentes eta Las Membranas . Erritmo eta dibertsioa ziurtatuak.  2007/11/14 - 01:41:06

FASTFATUM: Etxean egindako

Igor Calzada abeslari eta musikariaren alter egoa da FasTFatum , Harkaitz Cano idazlearekin elkarlanean burututakoa. Hurrengo egunetan izango da eskuragarri Igorrek berak konposatutako dozena bat kanturen grabazio bitxia. Road Movie moduko filma ere burutu du.  2007/11/08 - 12:22:09

ROY LONEY & SEÑOR NO : disko berriaren grabaketa

Roy Loney , Flaming Groovies talde aintzindarien partaide eta konposatzailea izandakoak talde berria du Europan zehar aritzeko: Señor No banda donostiarra. Eurekin kaleratu zuen Bottle of wine , Bloody Hotsak zigilu berriari estreinaldia ematen zion lau kantuko EPa eta egunotan amaitzen ari dira Loney berak konposatutako kantuez osatutako disko luzea. Andoaingo Garate estudioan.  2007/11/06 - 11:15:17

PETTI : ONenean

Bost urte behar izan ditu Pettik bere laugarren lan luzea argitaratzeko. On izenpean dozena bat kantu eder grabatu ditu bere sen elektrikoa eta akustikoa tartekatuz. Aitzitik, diskoak aldaketa nabarmenak dakartza kantuen formari eta soinuari dagokienez. Etapa berri bat hastearekin bat taldea berritu egin du Pettik. Joseba Irazoki gitarrista, David Gonzalez baxua, Ekain Elorza bateria eta Arkaitz Miner (biolina eta mandolina) eta Jexux Aranburu (akordeoia, hammond eta fender rhodes) dira Pettiren orain arteko diskorik irekiena eta osatuena ondu duten beste musikariak, Rafa Rueda ekoizlearekin batera. Zuzenean ere hasi dira eta azaroan baditu hainbat konzertu.  2007/10/30 - 20:47:15

PETTI : Onenean

Isilune diskografiko luze baten ondoren, Berako bakarlariaren laugarren diskoa karrikaratzen da egunotan. Bertan, kantu berriak eta zaharrak tartekatzen dira ON izeneko lan sortan. Kantu hunkigarriak, elektrikoak eta akustikoak grabatu ditu Azkarateko Katarain estudioan. Zuzenean, talde berriarekin arituko da azaroan.  2007/10/23 - 19:56:28