Faroa

Joxe Aranzabalen bloga

Arazoak mikroipuinekin

Orain hiru hilabete erosi nuen Karlos Linazasoro idazlearen azken liburua, Diotenez, baina arazoak ditut aurrera egiteko. Ipuin oso laburrez osatua dago liburu gehiena, batzuk zoragarriak, baina nekez egiten dut aurrera, seguruasko liburuak ipuin beste hari dituelako, alegia, mordoa. Badirudi nik arnas luzeko hariak behar ditudala, eta horregatik, segurutik, erosoago sentitzen naiz eleberriekin ipuin laburrekin baino.  2008/05/09 - 06:43:00

Safari nabigatzailearen hiztegia

Safari nabigatzaileak badu aplikazio bat oso erabilgarria ingelesezko testuak irakurtzeko: ingeles hiztegi bat. Testu bat irakurtzen ari zarela, estrapozu egiten baduzu hitz batekin ez dakizuna zer esan nahi duen, jarri punteroa hitz horren gainean, eta sakatu komando + control + D: leiho txiki bat irekiko da, eta hor agertuko da hitz horren esanahia, ingelesez. Firefox erabiltzen dut nabigatzeko, baina topo egiten badut ingelesez idatzitako artikulu interesgarri batekin, eta horren barruan zenbait hitz ezezagun, ireki egiten dut Safari, eta hiztegia erabili. Primeran datorkit.  2008/05/06 - 06:29:00

Kerobiaren musika jaitsi dugu

Jakin bezain laster Kerobia taldeak prest zuela azken diskoa jendeak libre jaisteko, sartu egin nintzen taldearen webgunean, eta jaitsi egin nuen diskoa. Ondoren, iTunes programan sartu, eta entzun egin nuen. Perfect. Mireni aipatu nion zelan jaitsi nuen diskoa, eta eskatu egin zidan. Orain kopia bat dauka bere pendrivean, eta, seguruenik, pasatu egingo die bere lagunei. Eskerrik asko Kerobia taldeari, eta zorterik onena disko berriarekin.  2008/05/05 - 12:24:03

Hiru belaunaldi

Joan den asteartean Xabier Lete eta Fermin Muguruza izan genituen fakultatean, Euskal Kulturgintzaren Transmisioa izeneko graduondokoan. Zoritxarrez, Xabier Leteri ordu erdiz entzun nion soilik, eta Fermin Muguruzari ezta hori ere. Hala ere, gogoan izango dut luzez Eñaut Elorrietak Xabier Leteri egin zion aurkezpena, bere etxean Xabierren poesiak eta abestiek eragin handia izan bide baitzuten. Amaieran, eta abisu barik, Eñaut Izarren Hautsa hasi zen kantatzen, a capella, Xabier aurrez aurre zeukala, eta gu denok adi-adi. Oilo ipurdia egin zitzaidan omenaldi hunkigarri hartan. Uste dut beste guztiak ere halaxe zeudela, hunkituta, eta, bukatutakoan, txalo zaparrada beroa eskaini genien biei ala biei. (Argazkia: Edurne Balzategi)  2008/05/02 - 12:09:07

Ramonek erretiroa hartu du

Gaur egun seinalatua da guretzat, gure anaia Ramonek erretiroa hartu baitu. Ez da neba-arrebetan zaharrena, beste bi ditu zaharragoak, baina aukera irten zaio, eta berak heldu aukerari. Izugarri poztu naiz beragatik, badakit-eta aurrerantzean egingo duela berak gehien maite duena: pintatu. Ramon margolari berantiarra da, baina nahikoa izan zituen erakusketa pare bat, denok aho bete hortz gera gintezen bere artearekin. Zorterik onena, Ramon, eta aldi emankorra izan dezazula!  2008/05/01 - 12:03:04

Justizia baino, mendekua

Garzon epaileak espetxeratu egin du Ino Galparsoro Mondragoeko alkatea. Esperpentikoa iruditzen zait, zentzugabea. Nik ere uste dut Inok eta bere alderdikideek kondenatu behar zutela Isaias Carrasco herkidearen hilketa. Uler nezakeen, halaber, beste alderdi batzuek alkatea kargutik kentzea zentsura mozio baten bidez, hori ere joko politikoaren barruan sartzen delako, baina gai izan ez direnak kontsentsu zabal bat mamitzeko, orain epaileak hasi dira mugiarazten, eurek lortu ez dutena lortzeko: Arrasateko alkatea kargugabetzea. Justizia, berriro, beste helburu batzuetarako erabiltzen ari dira.  2008/05/01 - 00:01:03

A zer zartakoa!

Ostia galanta, bai, atzo iluntzean hartu nuena etxeko eskilarak jaisten. Mirenen atzetik nindoan, esku bietan zabor poltsa banarekin, ahaleginak egiten etxeko giltzak zorroan sartzeko. Ezin hainbeste gauzarekin, antza, eta, halako batean, giltzak jausi, eta ni haien atzetik. Zartako izugarria sentitu nuen mokorraren ezker aldean, atzean. Arnas barik geratu nintzen, pentsatuta, gainera, hezur bat apurtu nuela. Miren iritsi eta segapotoa joka hastea, dena bat. Jaiki nintzen, hala ere, eta oinez hasi, Lazaro baten antzera. Oheratu aurretik, supositorio bat Voltarem hartu nuen, hanturen aurkako bat, eta, horri esker, apur bat hobeto jaiki naiz gaur.  2008/04/30 - 11:59:02

Gose

Atzo Gose taldea izan genuen HUHEZIn, Literatura Astearen barruan. Izugarri gustatu zitzaidan: berritzailea, alaia, erakargarria, aberatsa... Arriskatu egin dute bide horretan, baina iruditzen zait gauzak oso ondo egiten ari direla. Chapeau! (Argazkia: Amaia Pavon).  2008/04/25 - 17:34:01

Gaurko miraria

Urtean behin-edo gertatzen da, eta gaur izan da egun horietako bat: Elorriotik Mondragoeraino kamioi bat bera ere ikusi barik etorri naiz, erraz eta eroso. A zer pagotxa!  2008/04/24 - 11:27:02

Amarenean aurkitutakoak

Joan den larunbatean ama zenaren etxean izan ginen, hango ganbara garbitzen. Eta lan horretan ari ginela, aldizkari batzuk aurkitu genituen, Garaia aldizkariaren ale zaharrak, eta Zeruko Argiako orrialde hautatuak. Garaia aldizkarian atentzioa eman zidaten Juan Antonio Letamendiaren marrazkiek, Fits ezizenarekin sinatuak. Beste batean, I nma Ezkiaga eta biok agertzen gara, biok Martutenen sartu gintuztean. Horiekin batera, ESB alderdiaren bi iragarki aurkitu nituen, 1977an Zeruko Argian argitaratuak, bata Kongresurako eta bestea Senaturako hautagaien zerrendekin. Bitxiak iruditu zaizkit, eta Flickr -era igo ditut.  2008/04/23 - 11:23:00