Faroa

Joxe Aranzabalen bloga

Millennium berriro

Asteburu honetan Millennium filma ikusi dut, baina AEBetan egindakoa. Gustura ikusi dut. Hala ere, alderatuz gero originalarekin, nik nahiago hura. Akaso Daniel Craig hobeto moldatu da Mikael Blomkvist kazetaria antzezten, baina Lisbeth Salander askoz hobea zen originala, bat ere duda barik. Eta filma bera ere, hobea zen originala. Horiek horrela, ulertuko nuke filmaren remake bat egitea denbora bat igarota, baina ez orain, besteak oraindik hiru urte dituenean.  2012/02/06 - 12:00:01

Film ederra liburuzaleontzat

Liburuzaleok badugu film bat izendatuta aurtengo Oscar sarietara. Animaziozko film laburra da, eta izena du The Fantastic Flying Books of Mr Morris Lessmore (Lessmore jaunaren liburu hegalari fantastikoak). Hamabost minutu irauten du eta, egia esan, istorioa ez bada ere beste mundukoa, hunkitu egiten du. Erreparatu pertsonaia nagusiak zelako antza duen Buster Keaton zenarekin.  2012/02/03 - 13:10:05

Agur Megaupload, kaixo berriro torrent

Ikusteko dago zelako aldaketa gertatu den Interneten FBIk Megaupload itxi zuenetik. Astebete nahikoa izan da jende guztia torrent sistemara itzultzeko musika edo pelikulak jaisteko orduan. Nik, behintzat, izugarri igarri dut nire inguruan. Igaro gara sistema zentralizatu batetik (Magauploadena) sistema erabat dezentralizatu batera (torrentak). Eta pentsatzen dut poliziarentzat askoz ere zailagoa izango dela torrent darabiltenen kontra egitea, milioika lagun dira-eta. Llorenç Valverde irakasleak zioen moduan, uste zuten pasadoreari zulo bat tapatuta, konpondua zutela arazoa, baina kia.  2012/02/02 - 13:08:01

Zelan bilatu gaiak Faroan

Ustekabean konturatu naiz badagoela modu sinple bat gaiak bilatzeko blog honetan. Nahikoa da Faroaren URLari eranstea /tag/ eta bilatu nahi den hitza, Flickr-en eta beste zerbitzu batzuetan egiten den moduan. Aproba egin dut, eta konturatu naiz zenbait garien inguruan dezente idatzi dudala. Nire obsesioak izango dira. Adibidez: - Apple: http://goiena.net/blogak/faroa/tag/apple - Esteñibar:http://goiena.net/blogak/faroa/tag/este%C3%B1ibar - Euskara: http://goiena.net/blogak/faroa/tag/euskara - Google:http://goiena.net/blogak/faroa/tag/google - HUHEZI: http://goiena.net/blogak/faroa/tag/huhezi - Kindle: http://goiena.net/blogak/faroa/tag/kindle - Liburuak:http://goiena.net/blogak/faroa/tag/liburuak - Minbizia: http://goiena.net/blogak/faroa/tag/minbizia  2012/02/01 - 13:26:04

Plisti-plasta, lasterka

Aspaldiko partez, euripean egin dut lasterka. Larunbatean izan zen, eguerdi partean. Joan-ez-joan geundela, azkenean ausartu egin ginen, eta hara joan ginen Bego eta biok arineketan egitera. Bigarren minuturako blai eginda geunden, baina aurrera egin genuen, egoeraren arraroak kitzikatuta. Plisti-plasta joan ginen, eta busti-bustita etxeratu. Ohi ez bezala, etxeratutakoan zuzenean joan ginen dutxa beroa hartzera, gerorako utzita luzatze ariketak. Ez dakit zergatik, baina larunbateko lasterkaldiak haurtzaroa ekarri zidan gogora, orduko une pozgarriak.  2012/01/31 - 13:46:04

Elizaren rola haur lapurtuen auzian

Haur lapurtuen auzia haziz doa, eta gure harridura ere bai. Badirudi garai ez oso urruti batean Euskal Herrian ere negozio sendo eta ezkutu bat zegoela antolatuta, orduko zenbait diruduni haurrak emateko, berauek benetako gurasoei lapurtuta. Horretarako gure ospitaleak erabiltzen bide ziren. Ikusita 70 hamarraldian ere egin zirela horrelako izugarrikeriak, uste izatekoa da errudun haietako dezente oraindik bizi direla, tartean medikuak, erizainak, emaginak, abadeak eta mojak, garai haietan eliztar asko ibiltzen baitziren erietxeetan lanean. Ikustekoa izango da Eliza Katolikoak zer jarrera hartzen duen ikerketak aurrera egin ahala, lagunduko ote duen bere esku dagoen informazioa argitzen ala, pederastiaren auzian bezala, ezkutatu egingo ote dituen bere jendearen lotsak. Adi.  2012/01/18 - 11:51:04

Google +: zelan formateatu testua

Banuen gogoa ikasteko jendeak zelan formateatzen dituen testuak G+ sare sozialean, testuok dezente txukunago geratzen baitira aukera izanez gero hitzak beltzez, italikoz edo beste estilo batean jartzeko. Oraingoz, hauxe da ikasi beharrekoa: - Letra beltza. Hitz bat beltzez jartzeko nahikoa da berau bi izartxoz inguratzea: adibidez, *kaixo* - Letra italikoa. Berba bat italikoz jartzeko, inguratu hitza azpiko marra birekin: adibidez, _kaixo_ - Letra ezabatua. Idazteko berba bat ezabatua balego moduan, idatzi albo bietan gidoi laburra. Adibidez: -kaixo- Hiru estilo hauek neurrian erabiliz gero, testuak askoz ere erakargarriagoak egingo zaizkigu irakurleoi.  2012/01/17 - 12:11:01

Gabonetako oporrak, erizaindegian

Etxean igaro ditut Gabonetako oporrak. Gaixorik hasi nintzen bakazioak, eta izugarri kostatu zait nire onera itzultzea, hotzeria astindu ezinik ibili naiz-eta. Urteberritik aurrera, hor nonbait, hasi naiz hobeto sentitzen eta kirola berriro egiten. Eta horrek bizipoza itzuli dit, eta indarra. Alde horretatik, ondo etorri zaizkit oporrak, astia izan dut-eta patxadaz errekuperatzeko. Beharko dut, gaurtik aurrera buru-belarri murgilduko gara-eta lanean. Aurten, gainera, aditu titulu bat estreinatuko dugu, Komunikazioa erakundeetan, erronka galanta guretzat.  2012/01/09 - 08:23:03

Escuminac herrian, Kanadan

 2011/12/25 - 16:54:01

MUtelebista: hiru hizkuntza, euskaratik hasita

2010eko iraila ezkero, Mondragon Unibertsitateak telebista korporatibo bat dauka sarean: MUtelebista. Dagoeneko 46 erreportaje kaleratu ditu, astean bat, eta gero eta ikusle gehiago ditu, ez baita ohiko telebista korporatiboa: jende gazteak egina da, informal ukitua du, entretenigarria izateko bokazioarekin eta hiru hizkuntzatan zabaltzen da. Ezaugarriak Mondragon Unibertsitateak sortu zuen MUtelebista Interneten banatu eta ikus zedin. Asteazkenero, hiru minutu inguruko erreportaje bat kaleratzen du, gure ustez neurri egokia sarerako, eta erreportaje hori txertatzen da unibertsitatearen webgunean, bertako portadan eta MUtelebistak duen txokoan, hiru hizkuntzatan. Hiru hizkuntzatan, euskaratik hasita Hizkuntzei dagokienez, MUtelebistak betetzen du Mondragon Unibertsitatearen hizkuntza politika. Horren arabera, telebistan euskara da hizkuntza nagusia, eta aurkezleak egiten dituen aurkezpenak eta iradokizunak euskaraz daude eginak. Hori gertatzen denean, eduki horiek azpititulatu egiten dira gaztelaniaz eta ingelesez, horiek baitira MUren beste hizkuntzak. Baina norbaitek hitz egiten duenean beste horietako hizkuntza batean, orduan azpitituluak beste hizkuntza bietan jartzen dira. Hortaz, kasurik gehienetan euskara da hizkuntza nagusia, aurkezleak hizkuntza hori erabiltzen du-eta. Hala ere, noiz edo behin, euskarari ere tokatzen zaio azpidatzietan agertzea, eta hori gertatzen da elkarrizketatu batek gaztelaniaz edo ingelesez hitz egiten duenean. Proposatu genuenean hizkuntza politika hau MUtelebistarako, garbi genuen, batetik, bete beharra genuela unibertsitatearen hizkuntza politika, zeinak baitio unibertsitateak hiru hizkuntzatan bermatu behar duela irakaskuntza. Horrekin batera, nahi genuen euskara izan zedin gure telebista korporatiboaren ikur, guk, behintzat, horrela ulertzen dugulako geure egoera linguistikoa. Eta, azkenik, baina ez azkena, nahi genuen sortu formula bat edozeinek onartzeko modukoa, euskaraz ondo moldatzen direnak eta berau ulertzen ez dutenak. Gure proposamenak (hiru hizkuntzatan lan egitea, euskara izanda hizkuntza nagusia) oso harrera ona izan du, bai Mondragon Unibertsitatearen barruan, non euskararen erabilera desberdina baita hiru fakultateetan, eta baita kanpoan ere. Barne funtzionamendua, euskaraz MUtelebistak Erredakzio batzorde bat dauka gaiak proposatu eta telebistaren ibilia antolatzeko. Bertan daude: Idoia Peñakoba eta Susana Azpilikueta (Errektoretza), Amaia Aizpuru (Enpresagintza), Marian Iñurritegi (Goi Eskola Politeknikoa) eta Joxe Aranzabal (Humanitate eta Hezkuntza Zientzien Fakultatea). Eta taldea koordinatzen, Idoia Astigarraga (amatasun baimenarekin gaur egun) eta Aitor Arregi. Horrezaz gain, bi lagunek osatzen dute talde teknikoa: Idurre Lazkano, MUtelebistako ardurdun teknikoa, eta Ariane Irazusta, ikasle bekaduna. Talde osoaren arteko komunikazioa erabat egiten da euskaraz, bai ahozko komunikazioan (bilerak eta telefono elkarrizketak) eta baita idatzizkoan ere, horretarako posta zerrenda bat erabilita. Zabalkundea, batez ere euskaraz MUtelebistak lau kanal erabiltzen ditu bere erreportajeen berri emateko: Mondragon Unibertsitatearen webgunea, sare sozialak eta hedabideak. Lehen kasuan, erreportajeak txertatzen dira MU komunitatean dagoen txoko batean, bereziki sortua MUtelebistarentzat, eta hori hiru hizkuntzatan antolatzen denez, erreportajearen ondoko azalpenak hiru hizkuntza ofizialetan idazten dira. Sare sozialak ere erabiltzen dira egindako erreportajeen berri emateko: Twitter, Facebook eta Google +, eta bertan hizkuntza nagusia euskara da. Hedabideei dagokienez, berriz, euskaraz lan egiten duten hedabideei euskarazko azalpenekin bidaltzen zaizkie erreportajeak, eta gaztelaniaz dihardutenei, hizkuntza horretan egindako azalpenekin. Oihartzuna Nahiz eta MUtelebista proiektu apala den, hiru hizkuntzatan lan egiteak eman dio oihartzuna. Nazioartean, behin baino gehiagotan konturatu gara gure erreportajeak komentatu egin direla Twitter-en, ingelesez eta galesez idatzitako iruzkinetan. Danimarkatik ere etorri zaigu bisita bat, VIA Unibertsitateak bertatik bertara ikusi nahi zuen zelan egiten dugun telebista, eurek ere antzeko eredua aplikatzeko. Etxean, berriz, Sutan Blai saioak tarte bat eskaini zion MUtelebistari, Euskal Telebistan. Amaiatzeko, esango dugu MUtelebista egiten dugun lagunok eroso sentitzen garela hizkuntza planteamendu honekin, eta berau erabiltzen segituko dugula.  2011/12/20 - 12:05:01