Konponbidearen talaia

Euskal Herriko politikari buruzko bloga

Ulergarriak dira Jose Luis Rodriguez Zapateroren saltoak eta Jose Antonio Pastorren poz keinuak. Alderdi sozialistaren garaipena ez da nolanahikoa izan, ez Espainian, ez Hego Euskal Herrian. PSOEk duela lau urteko emaitzak berretsi behar izan ditu hurbildu zaion PP irabazi ahal izateko. Erronka ez da erraza izan, PPk etsi beharrean hobetu dituelako 2004ko emaitzak. Garaipena, hala ere, ez da Zapaterok nahi zuen bezain zabala izan. Baina Kongresuaren eta Senatuaren osaera sinplifikatu denez, CiU eta EAJren laguntzarekin baretu ahal du jardun politikoa, arazo berezirik gabe. Espainian, PSOEren aldeko boto mobilizazioak eragindako lurrikara, beraz, ez da izan neurri handikoa: 3,53 puntuko aldea baino ez dago PSOE eta PPren artean. Baina denbora pixka bat beharko da ikusteko Raxoiren bigarren porrotak --gutxigatik galdu arren-- PPren barruan sortutako pitzaduren ondorioak. Edozein modutan, euskal auziaren konponbidean ez dirudi urratsak egitea erraztuko duenik Espainiako Kongresuko oreka berriak. Lurrikararen tamaina, aldiz, handiagoa izan da Hego Euskal Herrian. Alderdi sozialistak bere markak hautsi ditu Araban, Bizkaian eta Gipuzkoan. Bizkaian lehen aldiz EAJ gailentzea lortu du. Eta Nafarroan onik eta indarturik atera da udako krisitik. Nola azaldu hain emaitza ikusgarriak? Batetik, bipolarizazioaren borrokan PSE-EEk PPri irabazi diolako. Espainiaren joeraren kontra, PPk botoak galdu ditu Araban, Bizkaian eta Gipuzkoan. Eta Nafarroan, CDNren lau urteko emaitzak kontuan hartuz gero. Bestetik, EAJren eta, oro har, hirukoaren ahulezia egoerarekin topo egin duelako. Segidan bi aldiz behera egin ondoren, egoera ahulean, EAJk ezin izan dio eutsi alderdi sozialistaren uholdeari, eta hirugarrenez egin du behera. Salbuespen gisa, Gipuzkoako emaitzak aipa daitezke, EAJk Batzar Nagusietarako bozetan baino gehiago bildu dituelako oraingoan. Arrasateko atentatuak ere eragin zuzena izango zuen lur azpiko mugimendu horiek azkartzeko orduan. Kasu honetan, Eusko Legebiltzarrerako hauteskundeak gertu egoteak (beranduen datorren urteko apirilean) areagotu egiten du astinduaren eragina. PSE-EEk 122.000 botoren aldea kendu dio EAJri (72.000koa EArenak batuz gero). Atzoko emaitzen estrapolazioak hankaz gora jarriko luke Eusko Legebiltzarraren osaera (are gehiago, ezker abertzalearen legez kanporatzeak irauten badu). Hemendik aurrera presio handia izango du alderdi jeltzaleak etorkizuneko estrategia zehaztean. Hain zuzen, Ibarretxeren bide orria arbeletik errealitatera eramatean. Guztira, 733.598 hautesle abstenitu ziren atzo Hego Euskal Herrian, duela lau urte baino 171.153 gehiago. Oso zaila da --edo ezinezkoa-- ezker abertzaleak abstentzio aktiboaren aldeko deiaren eragin zuzena neurtzea. Duela lau urteko boto baliogabearen kopurua (120.000) baino handiagoa? Baliteke, abstentzioaren itsasoa oso zabala baita. Baina argi dago salbuespen egoera salatzeko abstentzioaren aldeko hautuak ez duela lortu nahiko masa kritikorik sistema bera auzitan jartzeko. Negoziazio prozesuan politikaz hitz egin nahi ez zuen aldea (Zapateroren hitzetan), gainera, indarturik atera da hauteskundeetatik. Post scriptum: Abstentzioaren datuak errepasatzen ohartu naiz 2004tik 2008rako diferentzia kalkulatzean ez dudala kontuan hartu "kanpoan" bizi diren hautesleen emaitzak kontatu gabe daudela (bihar hasiko dira kontatzen). Horrek esan nahi du 2004ko emaitzekin alderatuz, 206.280 abstentzionista gehiago egon direla aurten. 2008/04/12 - 17:51:07

Iturriak

Konponbidearen talaia

Paperak mahai gainean

Ezezkoa espero denean

Garzonen azken jokaldiak

Urrutiko leihoa

Madrilgo inpresioak

Arrosaren lurrikara

Zenbakien lilura

Loiolako elkarrizketen erreferentzia

Bidegurutzearen irteera

Mugak eta helmuga