Konponbidearen talaia

Euskal Herriko politikari buruzko bloga

Pello Urizar EAko idazkari nagusia elkarrizketatzeko aukera izan dut. Berria TBrako egin genuen grabaketa joan den asteazken goizean, Lasarte-Orian, Digitalak ekoizpen etxearen estudioan. EAren apustua zertan den ikusteko baliagarria delakoan nago. Hauteskundeei buruzko pasarteak zeresanik eman du. Azpian duzu pasarte hori, zalantzak argitze aldera. 1. Pello Urizar Berria TB-n (Jatorrizko bertsioa) 2. Pello Urizar Berria-n (paperezko bersioa). Jesus Mari Larrazabalek duela gutxi idatzi du Eusko Alkartasunak baduela borondatea ezker abertzalearekin bat etortzeko, baita hauteskunde espazio bateratu batean ere. Noraino irits daiteke lankidetza hori? Hauteskunde koalizio bat ere posible izan daiteke etorkizunean? Egia esan, EAk bere apustua egiten duenean, mahai gainean aukerak agertzen dira, eta etorkizunak erakutsiko digu ze aukera izango den posible. Noski, aukeren artean hauteskundeetan batera joatea ere badago. Baina orain ez dakigu beste gauza batzuen artean ezker abertzaleak barne prozesu hori publiko egiten duenean zer agertuko duen. Ez daukagu argi agertuko diren konpromiso horiek posible egingo duten horrelako akordio bat egitea edo ez. Bakoitzak daukan barne gogoeta horretarako denbora behar da. Ezker abertzaleak berak publiko egingo ditu bere ondorioak. Bakoitzari denbora utzi behar zaio bere tokian jartzeko. Guk argi utzi dugu gure apustua estrategikoa dela, ez dela soilik hauteskunde jakin batzuetan finkatzen, eta hauteskundeetatik at edo gainetik egon behar duela. Soilik apustu estrategiko batekin eta luzerako akordio batekin izango dugu posible azkeneko 40-50 urteetan sufritzen ari garen gatazka honi irtenbidea ematea. Beraz, oraindik EAk ez dauka finkatuta hurrengo udal eta foru hauteskundeetan nola aurkeztuko den? Ez. Logikoena izango litzateke, besterik ez badago, alderdi bakoitzak bere zerrendak aurkeztea, baina, gure konpromisoa mahai gainean jarrita, itxaroten ari gara besteek zer esaten duten. Badago hainbat planteamenduren artean plataforma bat egitea, batzuekin edo besteekin joatea... Ikusiko dugu, argi daukagu prest gaudela esfortzua egiteko, eta ikusiko dugu beste eragileak zertarako dauden prest eta noraino dauden prest. Hori jakin gabe, logikoa da EAk ez argitaratzea zer egingo duen, ez dakigulako. Zer gertatzen ari da Nafarroan, eta, zehazki, Nafarroa Bairen barruan? Batzuek esaten dute ez direla bateragarriak Nafarroa Bai eta polo subiranista bat. EAk zer uste du? Zehazki, hori Txentxo Jimenezek esan zuen. Baina handik aste batera, Aintzane Ezenarrok hedabideetan esan zuen ezker abertzalearen gogoetak etorkizuna izango balu, eta posible izango balitz, berak ere ezkertiar abertzaleen arteko esparru horretan ikusiko lukeela bere burua. Orduan, mezu ezberdinak ikusten ditugu hor. Uste dugu batzuek barneratuta daukatela esfortzua egin behar dela, eta beste batzuek ez hainbeste. Guk bilgune subiranista hau plazaratu genuenean, adibide gisa Nafarroa Bai jarri genuen, Nafarroa Bai eratu zenean espiritu berarekin eratu zelako, egoerari erantzuteko alderdi abertzaleen arteko gutxieneko akordio batekin. Espiritu bera beste toki batzuetara aldatu behar dugu. Diferentziak eta gorabeherak egotea normala da. Ez diegu garrantzi berezirik ematen. 2010/01/24 - 18:37:01

Sintonia

2010/01/19 - 20:04:02

Lopezen eredua

Joan den ostegunean, Ganbara irratsaioaren tertulian parte hartu nuen, eta jorratu genuen gai nagusietako bat Patxi Lopez Eusko Jaurlaritzako lehendakariak aurkeztutako kontratu sozialaren inguruko proposamena izan zen. Esandakotik podcast pare bat atera ditut (gaztelaniaz). Hona hemen, ideia batzuen laburpena: - Lopezek ez du lortu herri eredu bat zirriborratzea, aurrekoaren ukazioan gelditu da - Kontratu sozialaren ideia ez da nahikoa - Akats bat da herri eredu bat zehaztu nahi izatea nortasun auziari uko eginez (hortik datorkio gizartearen atxikimendurik eza) - Jaurlaritzak badaki kudeaketarekin soilik ez duela atxikimnedu gehiago lortuko, irudi berri bat sortzen saiatzen ari da, baina nortasun arazoa baztertzen badu huts egingo du. AUDIOAK: 1. Herri ereduari buruz (1m 55s) 2. Kudeaketaz haratago (2m 45s) 2010/01/17 - 20:36:04

Fiskalaren lehen galderak

2010/01/13 - 21:45:02

Betiko estrategia

Abisua ez zen arratsalde bateko burutazioa, ongi pentsatutako zerbait baizik, Rubalcabak berak azaldu duenez. Abisua, baina, harrituta eta susmo txarrez hartu zuten, eta Barne Ministerioak azalpen gehiago eman beharra izan du. Espainiako gobernuburua ere saiatu da justifikatzen. Estrategia jakin bati lotutako agerraldia izan dela ziurtatu du. Ez du estrategiari buruzko argibiderik eman, baina ez du misterio handirik. Menpekotasun egoera aldatu nahi duten eragileak ahultzeko estrategia. Beldurra, debekua eta zigorra oinarri duen estrategia. Presoen bizi-baldintzak eta sakabanaketa salatu nahi duen manifestazioa debekatzen duen estrategia. Izan ere, Rubalcabaren beldurrezko mezuaren atzetik betiko estrategia babesteko asmoa antzeman daiteke. Hau da, polizi operazio gehiago eta debeku gehiago indarrean jartzeko estalgarria izan liteke Rubalcabaren abisua. Badaezpadako beldurra, badaezpadako errepresioarekin jarraitzeko. Azken batean, egungo egoeraren parametroak alda ez daitezen. 2010/01/05 - 00:19:02

Badaezpadako beldurra

Zertara dator Espainiako Barne ministroaren abisua ? Jokabidea ez da hain arraroa. Noizean behin, barne ministerioek horrelako abisuak edo alertak astintzen dituzte. Ez dute atzetik derrigorrez funtsik izan behar. Badaezpadakoak ere izan daitezke. Edota soilik beldurra eragiteko, zeren eta beldurra botereen tresna politiko bat izaten bada. Batik bat, egoera kontrolatzen ez dutenean izaten dute joera badaezpadako beldurra eragiteko. Urriaren 13ko polizi operaziotik (Arnaldo Otegi, Rafa Diez...) bi hilabete luze iragan dira. Ezker abertzalearen barne eztabaida aurrera doa, aparteko injerentziarik gabe, eta gauzen bilakaerak auzitan jartzen du Rubalcabareren estrategia. Ezker abertzalea sinesgarritasuna irabazten eta ikusmina pizten ari den bitartean. Irudi luke bilakaera hori mozteko beharrari erantzuten diola beldurraren mamua astintzeak. Gainera, badaezpako beldurrak badaezpadako polizi operazio gehiago egin ahal izateko estalpea eman ahal dio Espainiako Barne ministroari. Duela hiru urte, 2006ko abenduaren 29an, Jose Luis Rodriguez Zapatero Espainiako gobernuburuak aurreikuspen baikor bat egitera ausartu zen: Urtebete barru gaur baino hobeto egongo gara . T-4 bonba-autoak eztandaren bezpera zen. Orduan huts egin zuten aholkulariek jarraitzen al dute Barne Ministerioan? 2009/12/30 - 02:04:03

Estatuaren zulo beltza

2009/12/22 - 16:11:02

Iturriak

Konponbidearen talaia

Susmoak dirau

Loiolako erreferentzia

Bide orri argia