Edizio jarraia, Urola-kostako hitza

Urola-kostako hitzako azken ordua.

Zestoarrek Elgoibarren aurka lagun arteko partida izango dute larunbatean

Zestoako futbol taldeak denboraldi aurreko bigarren norgehiagoka jokatuko du larunbat honetan (irailaren 4an), 11:00etan, Iraetako futbol zelaian. Aurkaria Elgoibar izango du. Zestoako Futbol Taldeko kideek nahi duten guztiak futbol partida ikustera gonbidatu dituzte. Bestetik, futbol taldeko zuzendaritzakoek azaldu dutenez, larunbatean bertan Zestoako Futbol Taldeko bazkide izateko kanpaina abiatuko dute.  2010/09/02 - 16:15:02

Gaur bai, 09:00etatik lehian ari dira surflariak

Zarautz Pro Surf WQS 6 munduko txapelketa aurreikusitakoa baino hiru egun geroago hasi da. Gaur olatuek baimena eman dute, eta 09:00etatik uretan dira lehiakideak.  2010/09/02 - 16:15:02

Eguzkiñe Peña: "Lagun Onak taldea uzteak pena handia eman dit"

[Uztarria.com] Eguzkiñe Peñak (Azpeitia, 1992) Realeko nesken taldean jokatuko du datozen hiru denboraldietan. Lehenago, Lagun Onaken jokatzen zuen aurrelari azpeitiarrak. Asteburu honetan Zaragozako talde baten aurka jokatuko dute Superligako lehenengo faseko aurreneko partida. Uztarria.com — i eskainitako elkarrizketan hala esan du: " Lagun Onak taldea uzteak pena handia eman dit " .  2010/09/02 - 16:15:02

18:00etatik aurrera, Kontxako Banderaren lehen partea gizonezkoentzat

Gizonezkoen 24 ontzi ariko dira gaur 18:00etatik aurrera (18:00, ETB 1) Donostian, Kontxan, erlojuaren aurka arraunean. Kontxako Banderaren lehen partea izango da, eta zazpi taldek baino ez dute lortuko hurrengo iganderako sailkatzea. Datozen bi igandeetan erabakiko da zeinek eramango duen bandera preziatua milaka eta milaka zaleturen aurrean, baina aurrena gaurko azterketa pasatu beharko dute. Gurean, Getaria, Orio, Zarautz eta Zumaia ariko dira onenen artean sartu nahian. Emakumezkoek, berriz, irailaren 11n jokatuko dute erlojupekoa, final handiaren bezperan. Bertan izango dira Getariako, Orioko eta Zumaiako arraunlariak.  2010/09/02 - 16:15:02

Udan Loiolan iaz baino %10 bisitari gehiago izan da

Aurten, ekianetik abuztura bitartean, iaz baio bisitari gehiago hartu dituzte Loiolako Turismo Bulegoan. Orokorrean iaz baino %10 gehiago izan da, hau da, 8.000 bisitari inguru. Ekainean 2.053 bisitari etorri ziren, uztailean 1.746 eta abuztuan 4.200. Iazko datuekin alderatuz gero, uztailean beherakada gertatu da, baina ekainean bisitari kopurua %14 igo da eta abuztuan %21. Jatorriari dagokionez, " %54 Espainiako Estatuko bisitariak izan dira eta %18 Euskal Autonomia Erkidegokoak " , azaldu dute Turismo Bulegoaren arduradunek. Bisitari gehienek Loiolako santutegiari buruzko informazioa eskatu dute.  2010/09/02 - 16:15:02

Iraganari aingura botatzen

[Berria] 'Berriz Gure Naia' arrantzontzia Orioko kaian dago ainguratuta. Urtebete inguru da oporrak hartu zituela. Desegiteko zain dago orain. Baina herritar batzuek ez dute hori gertatzerik nahi, 'Berriz Gure Naia' egurrezko arrantzontzi bakarra baita Orion. Azkena. Gainontzekoak altzairuzkoak dira betidanik arrantzari lotutako herrian. Iraganeko arrantzale bizimoduaren aztarnetako bat da, beraz, eta hainbatek bizirik jarraitzeko kanpaina abiatu dute. Kaian aingurak botata, garai bati ere aingurarekin heltzen baitzaio eta iragana galtzea zailagoa baita.  2010/09/02 - 16:15:02

Joxe Arregi:"Frantziskotar, abiturik gabe"

Joxe Arregi azpeitiar frantziskotarrak utzi egingo dio fraide izateari, eta abiturik gabe frantziskotar izaten segituko du. Horren berri emateko gutuna bidali du hedabideetara. Berria egunkariak, berriz, elkarrizketa egin dio gaurko zenbakian, elkarrizketa osorik www.berria.info webgunean irakurri daiteke. Segidan, Arregiren gutuna osorik.  2010/09/02 - 10:18:06

Irailean ere festak ate joka

Iraila iritsi da eta, irailarekin batera, herritarrak lanean edo eskolan hasi dira udako oporrez gozatu ondoren. Irailean ere dena ez da betebeharretara mugatzen, ordea. Izan ere, asteburu honetatik bertatik aurrera eskualdeko hainbat txoko festa giroan murgilduko da berriz. Zestoan Amabirjin jaietaz gozatuko dute eta Zarautzen, berriz, Euskal Asteari ekingo diote. Bi festetako egitarauak webgune honetan bertan daude ikusgai, agendaren atalean. Aukeratu ekimenik gustukoena!  2010/09/01 - 16:34:01

Zarauzko surf txapelketan, gaur ere olaturik ez

[Berria.info] Atzo aurreneko eguna zen Zarauzko San Miguel Pro surf txapelketan. Baina nahikoa olatu ez zegoelako bertan behera utzi behar izan zuten lehiaketa. Gaur ere, beste hainbeste egin behar izan dute olaturik ezean. Antolatzaileek bihartik aurrera olatu onak izango direla uste dute. WQS zirkuituko txapelketa da Zarauzkoa, sei izarretakoa. Euskal Herriko surflari asko dira bertan. Lehenengo txandan hauexek sartuko dira uretara: Alex Gironi, Borja Agote, Romain Laulhe, Marcos San Segundo, Eneko Acero, Txaber Trojaola, Norman Landa, eta Jatyr Berasaluze. Bigarren txandan berriz, lau zarauztarrak lehiatuko dira: Mario Azurza, Aritz Aranburu, Hodei Collazo eta Igor Muniain.  2010/09/01 - 16:34:01

Olagarro gozoenaren sekretua

Herriaren ikur den animaliaren omenezko festarekin agurtuko dute uda zumaiarrek aurten ere. Zazpigarren urtez, Olarro Eguna ospatuko dute hilaren 18an eta, urtero bezalaxe, antolatu dituzten ekitaldien artean, lehiaketa gastronomikoa egingo dute Eusebio Gurrutxaga plazan, 10:00etatik 13:00era. Olagarroa prestatzeko hainbat era ezagutarazi, ahal den errezeta kopururik zabalena jaso, eta berrikuntza gastronomikoa bultzatzeko asmoz. Hitzordurako bi aste pasatxo falta den arren, izena emateko aukera badago jada.  2010/09/01 - 16:34:01