Edizio jarraia, Goierriko hitza

Goierriko hitzako azken ordua.

Ohiko ereduari jarraituz ospatuko dira etzitik aurrera Euskal Jaiak

Aparteko aldaketarik gabe, baina apartekotasunari eutsiz ospatuko dira etzitik hilaren 12ra Ordiziako Euskal Jaiak. Haurrentzako ekitaldiak, gastronomia lehiaketak eta ikastaroak, kirola, eta kantu, dantza eta bertso emanaldi bana izango dira zortzi egunez luzatuko diren jaietan. Eta tartean, Euskal Jaietako aparteko azoka ospatuko da, latxa ardi — esnez egindako 37. Gazta lehiaketa buru duela. Ohiko ganadu, fruitu eta barazki, eta euskal oilo lehiaketak ere izango dira egun horretan, baita profesionalen pilota partidak eta herri kirolarien erakustaldiak ere.  2010/09/02 - 17:14:03

Txistu Astea ospatuko dute datorren astean Urretxun

Urretxuko txistulari taldeak 50 urte beteko ditu datorren larunbatean. Hori ospatu asmoz, aste osoan zehar ekintza desberdinak burutuko dituzte. Astelehenean erakusketa irekiko dute, 50 urte hauetako irudiekin. Asteartean hitzaldia egingo dute, 'Txistua Euskal herrian mendez mende' izenburupean. Asteazkenean, hilak 8, erreportaje berezi bat proiektatuko dute Labeaga aretoan eta ostegunean urteurrenaren liburuaren eta DVDaren aurkezpena burutuko dute, udaletxeko batzar aretoan. Ostiralean azkenik, txistu eta soinu kontzertua izango da, Garikoitz Mendizabalekin eta Xabi Zabalarekin. Kontzertua izan ezik gainontzeko ekintza guztiak 20:00etan izango dira. Kontzertua aldiz, 20:30ean hasiko da.  2010/09/02 - 17:14:03

Aurtengo udan inoiz baino bisitari gehiago pasa da zazpi turismo bulegoetatik

Idiazabal, Lizarrusti, Ordizia, Ormaiztegi, Segura, Zegama eta Zeraingo turismo bulegoek inoiz baino bisitari eta turista gehiago hartu dituzte aurtengo uztailean eta abuztuan, iaz baino %7,1 gehiago. Uztailean 4.321 lagun pasa dira Goierri behean dauden zazpi bulegoetatik, eta abuztuan 5.985. «Aurreneko aldiz 10.000 bisitarien kopurua gainditu ditugu, eta nahiz eta Euskadiko datuak bere osotasunean kontuan hartuta zenbaki apala izan, Goierriko turismoa gorantz doala adierazten du datuak, eta sektore ekonomiko hori ere aurrerantz doala», adierazi du Goiturreko Niko Osinaldek.  2010/09/01 - 17:32:03

Herribason industrialdea egiteko proiektua onartu du Gipuzkoako Foru Aldundiak

Gipuzkoako Foru Aldundiak argi berdea eman dio Olaberriko Herribaso gunean industrialde berri bat egiteko proiektuari. Eneko Goia diputatuak azaldu duenez, proiektuak «erantzuna emango dio jarduera ekonomikoetarako herriak duen lurzoru beharrari». Industrialde berria 60.120 metro koadroko gunea izango da. Herribaso sektore berriko antolaketak dioenez, industria jardueretarako eta jarduera ekonomikoetarako eraikuntzek 24.012 metro koadro hartuko dituzte eta beste 2.640, komunitateko ekipamenduentzat gordeko dira. 335 aparkaleku ere egingo dituzte. Beste 23.120 metro, espazio libreak eta berdeguneak egiteko gordeko dituzte, eta hauetan, 330 zuhaitz landatzea aurreikusten da.  2010/09/01 - 17:32:03

Errepideko koska batzuen altuera murriztuko du Udalak

Abuztuan hainbat kaleetako eta auzotako errepideetan jarritako altxaguneetariko batzuk aldatzen hasi da Urretxuko Udala, autoetan kalteak sor ditzaten ekiditeko. Kosken altuera handia tarteko, gidarien artean zeresana eman dute errepideko oztopo berriek, auto askok behekaldearekin jotzen baitzituzten. Arazo horri irtenbidea emateko, altxagune batzuk kentzen eta baxuago batzuengatik ordezkatzen hasi dira. Datozen egunotan, lanak amaitu eta koskak margotu egingo dituzte.  2010/09/01 - 17:32:03

Larunbatetik zabalik dago Gi-632 autobian Zumarraga-Ormaiztegi zatia

Aurreko abuztuaren 2an itxi zuten GI — 632 errepidea Ormaiztegi — Zumarraga zatian. Zumarragako lotuneko zati bat eraiki ahal izan dute errepidea itxita egon den bitartean, trenbidearen gaineko pasabidea hain zuzen. Errepidea atzo zabalduko zutenaren aurrikuspena egin zuten Gipuzkoako Foru Aldunditik baina aurreko larunbatean irekita zegoen jada. Zirkulazioa, lanek iraun duten bitartean, GI — 2632 errepidetik bideratu dute, hau da, Eitzagako gainatik. «Urteko epe honetan zati honetako zirkulazioa nabarmen murrizten da eta horrela, erabiltzaileei ahalik eta kalte gutxien eragingo genien» horrela azaldu dute Aldunditik abuztuko errepidearen itxiera.Trenbidearen gaineko pasabidea eraiki dute, «lan horiek egiteko «langile nahiz erabiltzaileentzako segurtasun baldintzak bermatzeko errepidearen itxiera nahita ezkoa» zela gaineratu dute Foru Aldundiko prentsa bulegotik.  2010/08/31 - 23:37:03

Larunbatean zabaldu zuten Gi-632 autobian Zumarraga-Ormaiztegi zatia

Aurreko abuztuaren 2an itxi zuten GI — 632 errepidea Ormaiztegi — Zumarraga zatian. Zumarragako lotuneko zati bat eraiki ahal izan dute errepidea itxita egon den bitartean, trenbidearen gaineko pasabidea hain zuzen. Errepidea atzo zabalduko zutenaren aurrikuspena egin zuten Gipuzkoako Foru Aldunditik baina aurreko larunbatean irekita zegoen jada. Zirkulazioa, lanek iraun duten bitartean, GI — 2632 errepidetik bideratu dute, hau da, Eitzagako gainatik. «Urteko epe honetan zati honetako zirkulazioa nabarmen murrizten da eta horrela, erabiltzaileei ahalik eta kalte gutxien eragingo genien» horrela azaldu dute Aldunditik abuztuko errepidearen itxiera.Trenbidearen gaineko pasabidea eraiki dute, «lan horiek egiteko «langile nahiz erabiltzaileentzako segurtasun baldintzak bermatzeko errepidearen itxiera nahita ezkoa» zela gaineratu dute Foru Aldundiko prentsa bulegotik.  2010/08/31 - 17:41:02

Ataungo eliza parean aurkitutako giza hezurdurak X-XIV. mendeetakoak izan daitezke

Ataungo San Martin auzoko plaza berritzeko lanetan ari zirela, bina hilobi eta giza hezurdura aurkitu dituzte ustekabean; bata ume batena eta bestea pertsona helduarena. Aurreneko azterketa bat eginda, X — XIV. mendeen artekoak direla diote arkeologoek; hori zehazteko, Suhar etxearen esku utzi dituzte hezurrak, karbono 14aren azterketa egin dezaten. Hezurrekin batera, brontze ondarrak ere aurkitu dituzte; elizaren garai bateko kanpaia bertan galdatu zeneko arrastoak direla uste da. Udaletik azaldu dutenez, plazako lanek aurrera jarraituko dute, baina egindako aurkikuntza plaza berrian nolabait txertatzeko bideak aztertzen ari dira.  2010/07/23 - 22:41:04

Urretxuko Udal liburutegia irailean irekiko dute

Urretxuko Udal liburutegia irailean irekiko dute, ikasturte berriarekin batera. Azken asteetan berritze eta handitze lanak burutzen ari dira, gune berriaren azalera orain artekoarenaren bikoitza izango baita. Modu honetan, instalazio berriak txikien txokoa eta haur gunea (57 m2), bideoteka, kontsulta gela eta irakurgela nagusia (157 m2), taldelan gunea (40 m2) eta KZ gunea (54 m2) izango ditu, besteak beste. Berrikuntza nagusia hala ere, taldean lan egiteko gunea izango da.  2010/07/23 - 16:45:07

Irailaren 18an egingo da Legazpiko kale pintura lehiaketa

Irailaren 18an, larunbata, ospatuko da Legazpiko VIII. kale pintura lehiaketa. Aurten ere bi sail izango dira, gai librea eta paisaia industriala, eta bietan ere 650 euroko saria emango dute. Edonork hartu ahal izango du parte eta teknika ere librea izango da. Formatuari dagokionez berriz, margolanaren alderik handienak ezingo du metro bateko luzeera gainditu. Interesa dutenek, lehiaketaren egunean bertan, 9:00etatik 10:00etara eman beharko dute izena udaletxe atarian.  2010/07/22 - 17:01:01