Ea, Busturialdeko hitza

Hitzako albiste zerrenda ea

Eskupilota eskola antolatu gura du Udalak

Umeentzako eskupilota eskola antolatu gura du Eako Udalak. Urte osoan, umeek eskolak astean birritan hartzea da Udalaren asmoa: aste barruan behin eta zapatu goizetan. «Beti ere, izena ematen duten ume kopuruaren arabera eta gurasoekin adostuta», argitu du Asier Madarieta Eako alkateak. «Eta eskola antolatzeko beste ume egon ezean, beste modu batera antolatu beharko dugu». Unai Iglesias izango da irakaslea, eta gura duenak oraindik izena eman dezake. «Asmoa da astean zehar umeak eskupilotan aritzea, ikasteko eta jolasteko aukera izan dezaten». Madarietak azaldutakoaren arabera, «eskupilota ikastaroaz gain, palako ikastaroa ere hartuko dute eskolan izena ematen duten umeek».  2008/03/14 - 01:22:16

Trafikoaren berrantolaketa egingo du Udalak Aste Santuan

Eako Udalak herriko trafikoaren berrantolaketa aurreikusi du Aste Santurako. Hain zuzen ere, Jesus, Barria eta Atxikar kaleak norabide bakarrekoak jarriko ditu egun horietan. Nagusia eta Aritza kaleak, aldiz, itxi egingo dituzte, baimenduna duten autoentzako ezik.  2008/03/14 - 01:22:16

Udalbatzak azken osoko bilkuran izan duen jarrera salatu du ezker abertzaleak

Otsailaren 20an egindako osoko bilkura dela eta, EAJk eta EAk izandako jarrera salatu du Eako ezker abertzaleak. Besteak beste, EAE-ANVren ilegalizazioa eta Karmelo Landaren atxiloketa salatzen zituen mozioa aurkeztu zuten EAJk eta EAk osoko bilkura horretan. Euren kideen aurkako atxiloketak eta alderdiaren aurkako ilegalizazio neurriak salatzeko egindako osoko bilkuraren berri ez izateak «zentzurik ez» duela gaineratu du ezker abertzaleak. EAJk eta EAk adostutako testua aurkeztu eta Espainiako Gobernuari EAE-ANV alderdi politikoaren ilegalizazioa bideratuko duen demanda erretiratzeko eta Karmelo Landa eta gainontzeko atxilotuak aske uzteko eskatzea onartu zuen udalbatzak otsailaren 20an. Horrez gain, espainiar estatuak indar politikoen suspentsioa erabakitzea eta ETAren azken atentatua larritzat jo zituen, besteak beste. ...  2008/03/13 - 11:13:28

`Ortuaren maneju naturala´ ikastaroa antolatu dute Natxituan

Natxituko jai batzordeak ortuaren maneju naturalari buruzko ikastaroa antolatu du. Bihar izango da izena emateko azken eguna. Ikastaroan parte hartu gura dutenek `Natxi´-rekin jarri beharko dute kontaktoan edo 94 627 60 05 telefono zenbakira deitu. EHNE sindikatua izango da ikastaroa emateaz arduratuko dena. Otsailaren 20an hasiko da eta hamabostean behin emango dituzte klaseak, eguaztenetan, 16:30ean, Natxituko bolatokian. Guztira zazpi saio izango direla zehaztu dute antolatzaileek. Ikastaroan izena ematea dohainekoa izango da.  2008/02/15 - 01:05:27

Herenegun geroztik Soto del Real espetxean dago Karmelo Landa

Ezker abertzaleko kide Karmelo Landa eatarra Madrilgo Soto del Real espetxean kartzelatu dute. «Jakinarazi digutenez, oraindik ez dute modulora eraman, eta ez omen dute eramango datorren astera arte», azaldu du Landaren neskalagun Carmen Zelaiak. Eguazten gauean eroan zuten Landa Soto del Real espetxera, joan den astelehenean atxilotutako beste hamar kiderekin batera. Izan ere, Espainiako Audientzia Nazionaleko epaile Baltasar Garzonengana eroan zituzten herenegun astelehenean atxilotutako ezker abertzaleko hamalau kideak. Karmelo Landa izan zen lehena epailearen aurretik pasatzen, eta uko egin zion deklaratzeari. Hamalau atxilotuetatik 11 baldintzarik barik espetxeratzeko agindua eman zuen Garzonek. Denei Batasuneko Mahai Nazionala berregiteko ahaleginetan aritzea eta, ondorioz, ETAko kide izatea leporatzen die Garzonek. ...  2008/02/15 - 01:05:27

Izarrez betetako Bolatokia

Bariku iluntzean hainbat lagun batu ziren Natxituako Bolatokian, bertako bertso eskolaren eta Zallakoaren arteko desafioa ikusteko. Antolatzaileek azaldu dutenez, «desafioak film eredua hartu zuen eta bertsolariak zine izarrak izan ziren. Eszenatokia zine pantaila bezala apaindu genuen». Saioan zehar protagonistak, sei bertsolariak, mozorrotu egin ziren. Telebistan legez, Bolatokian ere ez zen iragarkirik falta. Markel Arano Natxituako bertso eskolako kideak iragarkien tartean bertso-joko ezberdinak egin zituen. Antolatzaileen esanetan, «bera izan zen entzuleen aldetik txalo gehien jaso zituena». Berdinketa Natxituako bertso eskolatik Aitor Arrizubieta `Toko´, Alex Arrillaga eta Jon Arano aritu ziren taula gainean. Talde bakoitzak epaile bat jarri zuen. Natxituarren aldetik Ander Elortegi aritu zen epaile lanetan. Epaile biek azkenean berdinketa ematea erabaki zuten. Horrela, laster Zallako gaztetxean izango den saioan jakingo da zein den desafioko irabazlea. ...  2008/02/13 - 00:48:24

Espainiako Poliziak Karmelo Landa atxilotu du, Garzon epailearen aginduz

Espainiako Auzitegi Nazionaleko epaile Baltasar Garzonen aginduz, Polizia Nazionalak ezker abertzaleko hamalau kide atzeman zituen astelehen goizaldean, Karmelo Landa eatarra tartean. Bilboko etxean atxilotu zuten Landa, gauerdi aldera. Batasuneko, EHAK-ko eta EAE-ANVko kideak dira atzo atxilotutako hamalau lagunak eta, Espainiako Barne Ministerioaren arabera, Auzitegi Nazionaleko bosgarren instrukzio aretoko 4/08 sumarioa betetzearren gauzatu dute polizia operazioa. Hain justu, «Batasuneko Mahai Nazionala berregituratzeko saiakeran aritzea» egotzi die Garzon epaileak atxilotuei, eta, ondorioz, delitua errepikatzea eta «erakunde terroristako kide edo laguntzaile» izatea. «Ikerketen arabera, Batasuneko buruzagi klandestino lanetan aritu dira atxilotuak eta EHAK eta EAE-ANV alderdiak dinamizatzen parte hartu dute», dio prentsa oharrean Espainiako Barne Ministerioak. ...  2008/02/12 - 00:40:16

Zallarekin neurtuko da Natxitua barikuan, bertso desafioan

Bertso desafioa egingo dute bariku honetan Natxituan, bigarren urtez jarraian. Bolatokian izango da, 20:00etan, eta oraingoan Zallako bertso eskolakoen aurka aritu beharko dira natxituarrak. Zinema baten itxura hartuko du Bolatokiak, eta bertsolariak eurak mozorrotuta lehiatuko dira. Barikukoa lehenengo erronda izango da, eta bigarrena Zallan egitea da antolatzaileen asmoa. Elkar ezagutzeko Natxituako bertso eskolako kide Ander Elortegik azaldu duenez, «oraindik ez dugu zehaztu guretik zeintzu bertsolari lehiatuko diren, baina hiru ariko dira, Zallako beste hiru bertsolariren aurka». Iaz antolatu zuten lehenengoz bertso desafioa, eta orduan Itzubaltzetako (Erromo) bertsolariekin lehiatu ziren natxituarrak. «Eskola hasi berriek elkar ezagutzeko eta bertsolariek beste plaza bat izan dezaten antolatu genuen iaz bertso desafioa, eta ondo atera zen». ...  2008/02/07 - 00:05:14

Udalak hondakinak birziklatzeko ikastaroa antolatu du

Hondakinak birziklatzeko ikastaroa antolatu du Eako Udalak. 36 orduko iraupena izango du horrek. Oraingoz eguaztenetan bakarrik ematen dute, baina otsailetik aurrera astelehenetan ere emango dituzte klaseak. Bertan, nola birziklatu behar den, hondakin bakoitza zein edukiontzitara bota behar den eta jendeak egiten dituen akatsak nola zuzendu irakatsiko dute. Oraingoz taldea 11 herritarrek osatzen dute, baina nahi duenak oraindik izena emateko aukera du. Prezioa 50 eurokoa da eta ordaintzeko laguntza ematen du Udalak.  2008/01/19 - 00:16:52

Etxahun Lekue eta Miren Amuriza bertsolariak Natxituan

Urtero antolatzen du bertso-afariren bat Natxituako Jai Batzordeak. Aurtengoa datorren zapatuan izango da ¬azaroaren 24an¬eta Etxahun Lekue larrabetzuarra eta Miren Amuriza berriztarra gonbidatu dituzte. Laugarrenez antolatuko dute bertso-afaria. Iaz ez zuten egin, baina aurreko urteetan Jon Maiak, Unai Iturriagak, Igor Elortzak edota Mañukortak abestu dute. Erreserbak telefonoz Aurrekoetan legez, Bolatokian izango da afaria, 21:00etatik aurrera. Joan gura dutenek 946276005 (Arano) telefonora deitu beharko dute. Hori bai, izena aurretiaz eman arren, afaria egunean bertan ordaindu behar da. Prezioa oraindik zehaztu barik dago.  2008/01/10 - 11:05:10