Parabola zuzena

Arriskutsua da malko bako begiak inaustea

zerutik amabirjina  Ikeako aulki batean jaisten denean

Jose zurgina kaletxakur langabea baita usopasari begira

haren emaztearen amets bustietan,

eta gernu bedeinkatua negar eragiten dio

ozpin bako zauriak itsusiak baitira jainkoen gorpuetan.

Deusek ez du deus balio,

Hirutasunaren begiak donutsaren zulotik

errua urrea dela sinetsarazi digu,

hain erraz ereiten dira gezurrak inozoen arrakaletan,

eta bitartean haren apaizak paradisu fiskaletan bizi dira

limosnak limusina bihurtuta,

ogia eta orgia ala urkabila, mehatxatu gaituzte

fedeak dena onartzen baitu jainkotzat,

baita berba egiten duten sasiak ere,

negarra da eguneroko belarra

dioskute profetek eta Ogasun ministroek

eta, kontsolatzeko,

artalde negarjaleak Tele5eko albistegiak irensten ditu

horra hor gizakien eboluzioa errotonda berean bueltaka.

Azken baten,

Darwinek arrazoi bazuen,

hasierako izaki hark primitiboa eta akatsez betea izan behar zuen,

eta, agian horregatik,

apokalipsia has zedin,

zazpigarren egunean kanpaia jo zuen.

Ron Sniakin