Ate joka dira San Martin jaiak. San Martin Agirre eguna –irailak 16– zapatua izanik, astebete lehenago, irailaren 9an, egingo da feria –hurrengo astean emango ditu Udalak azokaren eta gainerako ekitaldien inguruko xehetasun guztiak, egitarauaren aurkezpenean–. Udalak aurreratu dutenez, baina, gazta lehiaketan 21 postuk hartuko dute parte eta barazkien eta fruten lehiaketan, berriz, 15 postuk.
Danborrada arautzeko beharra
Azokak hartuko du protagonismoa irailaren 9an. Hala ere, aldez aurretik izena ematea beharrezkoa den ekitaldiak ere badira, eta horren adibide da helduen danborrada.
Udalak, 2016an parte hartu zuten taldeetako zuzendari gehienen adostasunarekin, danborradaren funtzionamendua arautzea erabaki du aurten. Hala, izena emateko azken eguna gaur da, irailak 1. Honako datu hauek eman beharko dira Kultura Zerbitzuan: taldearen izena, taldekide kopurua, taldeak danborra edo barrika joko duen eta taldeko zuzendariaren kontaktua –izen abizenak, telefono zenbakia eta helbide elektronikoa zehaztu behar dira–.
Orain arte 18 taldek eta 550 parte hartzaile inguruk eman dute izena. Entseguak, berriz, irailaren 5ean, 6an, 11n, 12an eta 13an izango dira seminarioko karpan (20:00). Hori bai, talde bakoitzeko zuzendaria irailaren 5ean Musika Eskolan 18:00etan egingo den saiora ere joan beharko da.
Bestalde, taldearen ardura izango da danborradarako banderak lortzea; eta banderaduna, ahal dela, emakume bat eta gizon bat izan beharko da. Izan ere, talde bakoitzak gehienez bi bandera eraman ahal izango ditu.
Euriarekin, ibilbide motza
Iaz euripean egin zen helduen danborrada eta aurtengora begira zenbait erabaki hartu dira. Eguraldi txarra egiten badu danborrada San Martin plazatik behin bakarrik pasatuko da; bestela birritan pasatuko da.
Hori bai, Udalak pontxo batzuk erosiko ditu eta euria eginez gero parte-hartzaileei banatuko zaizkie. Danborrada bukatutakoan bakoitzak pontxoa bere etxera eramango du, ez da danbor eta makilekin batera entregatuko.
Talo eta odoloste postuak
Irailaren 9ko azokan taloen eta odolosteen postua –Katabixa plazan, Oxirondo ondoan– jartzeko zozketa egin du Udalak: Harrera elkarteak jarriko du taloen postua eta Jardun euskara elkarteak, berriz, odolosteena.