Esparzak «ahul eta lidergorik gabe» ikusten du gobernua

IRUÑEA. Javier Esparza UPNko presidente eta Navarra Sumako bozeramaileak Nafarroako Gobernuaren urtebeteko jardunaren balorazioa egin zuen atzo, agerraldi batean. Haren iritziz, Maria Txibiteren gobernua «ahula eta lidergorik gabea» da: «Presidentea da, baina ez du lidergorik». Esparzak gogoratu du PSNko parlamentariak 11 baino ez direla, eta «EH Bilduren eskuetan» egotea leporatu dio Txibiteri: «Ekimenik gabeko gobernu bat da, politika nazionalistekin jarraitzen duena; bere buruarengan konfiantzarik ez duen gobernu bat, eta, ondorioz, erabakirik hartzen ez duena». Esparzaren ustez, Txibiteren gobernuak «berandu eta gaizki» hartu ditu erabakiak azken urtean: «Ez du soluziorik ematen, horrek barne tentsioak sortuko lizkiokeelako».

Esparzak uste du hobea litzatekeela PSNk eta Navarra Sumak osaturiko gobernu bat eratu izana. COVID-19aren kudeaketa ere kritikatu du Navarra Sumako eledunak, eta, egoera ekonomikoari dagokionez, nabarmendu du ez dagoela argi Txibitek aurrekontuekin zer eginen duen: «Ez du segurtasunik ematen».