Lehen tantoan ikusi genuen amezketarra ez zela uzkurtuko: gorriei eman zien sakea txapak eta Olaizolaren sakea aidean hartu ezkerrez eta txokoan utzi nahi izan zuen; gutxigatik joan zitzaion txapapera.
Bikote oso ona osatu zuten Jokinek eta Barriolak, Barriolak gehienetan agindu egiten zuen atzeko koadro laburtuetan eta Jokinek oso ondo mugitu zuen pilota okasioa izan zuen guztietan; tanto bikainak ere egin zituen, baita jenialitateren bat edo beste ere. Esate baterako, partida hasieran egin nahi izan zuena, Olaizolaren sakea airez hartu ezkerrez eta goxo-goxo txokoan utzi, erdi aldera egiten saiatu zen berriro eta, oraingoan, ezin hobeto atera zitzaion; esan behar da antzeko bat egina ziola Olaizolak apur bat lehenago, Jokinek jotako sakea ezker gantxoz zabaleratu zuenean txapa gainera ziztu bizian. Mendean egon zirenean ere oso zirrikitu gutxi utzi zuten. Esandakoa, partida bikaina, lau pilotariak maila oso onean, Altuna eta Barriola hobeto, eta hauentzat bost terdi barruko Bizkaia sari nagusia.
Jaka-Rezustak 22, Artola-Zabalak 18
Bizkaia sariaren finala jokatu aurretik, eskualdeko bi pilotari ikusi ahal izan genituen nor baino nor. Jaka lizartzarrak Rezusta zuen atzean lagun eta Artola alegiarrak Zabala. Partida gustagarria eskaini ziguten, benetan.
Lizartzarrak irabazi zuen. Rezustak agindu zuen atzean eta, nahiz eta Zabalak partida oso txukuna egin, pilota dexente errematatzeko aukera izan zuen Erikek, baita ondo egin ere; aurreko hormatik gertu ikusgarri aritu zen tantoak bukatzen; defentsa lanetan ere azken aldian baino hobeto ikusi genuen. Iñaki Artolak, berriz, atzeragotik aritu behar izan zuen eta errematatzeko ia aukera guztiak berak sortu behar izan zituen; Rezustak jo ez ezik kantxa asko kubritzen du gainera. Baldintza horietan aritzeko bete-betekoa ez behar bada, baina gustura samar geratzeko moduko partida jokatu zuen.