Ateaga elkartearen aurkako pintadak agertu dira Anoetan

Tolosaldeko Ataria 2016ko urr. 10a, 16:20

"Elkarteak ere gureak dira, Ateaga matxista!" lelopean egin dituzte pintadak Anoetako elizaren ondoan. Elkarte horrek ez diete uzten emakumeei bazkide izaten, ekintzaren egileek salatu dutenez.

Ekintzaren egileek adierazi dutenez, ekintza horren bidez salatu dute elkartearen izaera "matxista". Azpimarratu dutenez, elkarte horrek ez diete emakumeei uzten elkarteko bazkide izaten, eta "arazo hori erdigunera" ekarri nahi izan dute: "Emakume eta gizonen arteko parekidetasun faltsua saldu nahi badigute ere, berriz ere argi geratu da jendarte matxista batean bizi garela, eta horrelako elkarteek jarrera horiek elikatu eta erreproduzitu egiten dituzte".

Jarrera horiek sistema kapitalista eta heteropatriarkatuaren ondoriotzat jo dituzte. Azpimarratu dutenez, sistema horren oinarria gizonen eta emakumeen arteko botere harremanak dira, emakumearen "zapalkuntza sistematikoa": "Emakumea etxean, isilik, otzan eta esaneko behar du sistema horrek, espazio pribatura mugatu eta lan reproduktiboaz arduratzen den emakumea".

Zentzu horretan, nabarmendu dute sistema hori elikatzen duten jarrerak salatzen eta publiko egiten jarraituko dutela: "Ez gara geldituko emakumeen eta gizonen arteko parekidetasun erreala lortu arte. Ez gara geldituko emakumeak etxeko sukaldetatik atera, eta kalean, herriko elkarte, taberna eta txoko guztietan aske eta libre ikusi arte". 

Ez diogu hau kapritxo hutsagatik: lagun gaitzazu . Eduki hau guztia doan ikus dezakezu euskarazko hitzik gabeko Tolosaldea ez dugulako irudikatzen. Atarikide, iragarle eta erakunde askoren laguntzarik gabe ez litzateke posible hori. Gero eta komunitate handiagoa sortu, orduan eta sendoagoa izango da Ataria: zurekin, zuekin. Ez utzi biharko gaur egin dezakezun hori: egin zaitez Atarikide!


EGIN ATARIKIDE!