Hauteskunde sindikalak bultzatzeagatik Sutargitik langile bat kaleratu dutela salatu du ELAk

Tolosaldeko Ataria 2016ko eka. 28a, 19:34
Elkarretaratzea egin dute langileek Ikaztegietan.

ELA sindikatuko zerrendan doa kaleratutako langilea. "Hamasei urte lanean aritu ondoren, errendimendu baxua argudiatuta bidali dute", salatu du sindikatuak. Kaleratzea auzitara eraman dute, eta elkarretaratzea egin dute Ikaztegietan.

Sutargi enpresak bost gune ditu, horietako bi Ikaztegietan, eta bana Alegian, Belauntzan eta Legorretan. ELAtik azaldu dutenez, orain arte ez da izan ordezkaritza sindikalik enpresan eta langileak mobilizatu dira hauteskundeak antolatzeko. Dagoeneko abian jarri dute hauteskundeak egiteko prozedura, eta kaleratzea horren ondoren etorri dela esan dute sindikatutik. Kaleratutako langilea ELAren hautagaia dela azaldu dute, eta hauteskundeen antolaketa bultzatzen ari zela.

Elkarretaratzea Despidorik ez, hauteskundeak bai lelopean egin dute gaur Ikaztegietan, eta enpresaren gune ezberdinetako langileek parte hartu dute. Sutargi enpresan 150 langile inguruk lan egiten dute, tartean urritasun fisikoak eta psikikoak dituztenak.

Ez diogu hau kapritxo hutsagatik: lagun gaitzazu . Eduki hau guztia doan ikus dezakezu euskarazko hitzik gabeko Tolosaldea ez dugulako irudikatzen. Atarikide, iragarle eta erakunde askoren laguntzarik gabe ez litzateke posible hori. Gero eta komunitate handiagoa sortu, orduan eta sendoagoa izango da Ataria: zurekin, zuekin. Ez utzi biharko gaur egin dezakezun hori: egin zaitez Atarikide!


EGIN ATARIKIDE!