isiltasuna baino garrantzitsuagoa delako
isiltasuna baino garrantzitsuagoa delako artikuluen jarioa
esan nahiko nizukeenaz
Zure berri dudan aldiro damu naiz aurreko aldian ezer esan ez izanaz. Espero dut hurrengoan dena kontatzeko gai izango naizela. Eta ez dela beranduegi izango. Ez bainaiz nere sentimenduen erantzule. 2016/03/18 - 14:45:23
Zuk
Ohean etzanda. Saiheska, eskubitara begira. Zu. Gora begira. Zu. Ezkerretara. Zu. Berriz eskubitara. Eta berriz zu. Zu. Berriz ere loari tokia kendu diozu nere ohean. 2016/03/18 - 14:45:23
bideak
Eta jakin nahi duzuna ez zaizula gustatuko baldin badakit? Leku berera daramaten bi bideren bide-gurutzean nagoela esan daiteke. Kontatzen badizut, badakit ez zaizula gustatuko. Eta kontatzen ez badizut ere ez. Hirugarren bide baten bila nabil... 2016/03/18 - 14:45:23
ezin ahaztu
Bizitzan une asko daude ahaztu ezin direnak. Oroitzapen asko gure memorian. Behar ez ditugunean burura datozkigunak, eta behar ditugunean gogoratzea hainbeste kostatzen zaizkigunak. Zorionez, une ahaztezin asko pasa ditut bizitzan. Zoritxarrez, ahaztuko ez ditudan une gehiegi pasa ditut bizitzan. Zurea. Zurea. Eta zurea ere ezin dut ahaztu. Harreman hasierak, harreman amaierak, lagunekin igarotako momentu onak, familiako momentu sentituak, zoriontsu izandako uneak eta negar malkoak gastatu zitzaizkigun uneak. Une horiek ezin dira ahaztu. Baina horietatik, une txarrak burutik kendu behar genituzke lehenbailehen. Lekzioa ikasi orduko kendu beharko genituzke burutik. Burutik kendu diot, ez ahaztu, ezinezkoa baita une batzuk ahaztea. Edozein detailek ekar diezazkiguke une horiek oroimenera; arropa batek, kolore batek, usain batek,... baina goibeltzen gaituzten uneak badira, burutik kentzen jakin beharko genuke. Alaitzen gaituztenak badira, aldiz, utzi eguna alai diezaguten. 2016/03/18 - 14:45:23
Elumetan
Atzo elurra egin zuen, eta herri osoa zuritu zen. Herri hau ez da aspaldian hain polita egon. Etxetik atera orduko umorea alaitu zidan elurrak. Eta egun osoan zehar egin zuen elurra. Aspaldian ez nuen elurra ari duela kalean ibiltzeko aukerarik izan. Elurra jostalari zebilen, aurrera eta atzera, jira eta buleta, jostalari. Jostalari, harik eta inongo lotsatienaren moduan gure gorputzean pausatzen den arte, otzan-otzan, ikaratuta bezala, lotsati. Jostalaria eta lotsatia bezain engainagarria den elurrak egun polit bat oparitu zigun atzo. Une batez, ume sentiarazi gintuen. Polita izan zen. 2016/03/18 - 14:45:23
Bart
Bart zurekin egin dut amets. Ez. Zurekin igarotako momentuekin egin dut amets. Eta zurekin igaro nahi izan nituen momentuekin. Ala zurekin ere bai? 2016/03/18 - 14:45:23
Utzi
Gaur ere idatzi egin dizut. Aurrekoan bezala. Aurrekoan ere nik idatzi nizun. Eta zuk erantzun. Baina zuk ez didazu idazten, eta askotan ez didazu erantzuten. Honek arraro sentiarazten nau. Aurpegia eman gabe zure bizitzan zure baimenik gabe sartuko banintz bezala. Badakit zenbaitetan nire sentipenak baino ez direla, eta tarteka gustura irakurtzen dituzula nire mezuak. Beraz, zergatik ez didazu zure bizitzan sartzeko baimenik ematen? Zergatik ez didazu zuk idazten? Beharbada elkarri idatzitakoei ez diezulako nik adina garrantzi emango, ez behintzat mezuak zure eta nire artekoak izate hutsagatik. 2016/03/18 - 14:45:23
ez gaizki ulertu, gaizki-ulertua izan zen
Batzuk kostata esaten ditugu gauzak. Hitz egiteko beldurrik ez dugu, baina esateko bai. Barneko sentimenduez ari garenean batez ere. Larrosak bezala kapaz kapa irekitzen joan behar dugu, gure barruko sentimenduak erakutsi arte. Kostata irekitzen gara, baina hitz edo keinu desegoki bat nahikoa da kolpetik ixteko. Baita hitz edo keinu hori gaizki-ulertu bat izan bada ere... Baina horrelakoa naiz. Atzera joan eta gauza asko aldatuko nituzke, detaile txiki asko. Baina orduan ezingo nintzake aurrera joan, eta bizitza aurrera doa. Agian hurrengoa ongi ulertuko ditut gauzak. Agian ongi adieraziko dut sentitzen dudana, ohean nagoenean bezala. 2016/03/18 - 14:45:23
Denbora gelditu nahiko nuke
2016/03/18 - 14:45:23
ni hesi
2016/03/18 - 14:45:23
