Patxitrapero
Ikusezintasunaz
Galdetu zion halako batean: - Zerk egingo lizuke aparteko ilusioa? - Ikusezin izateak. Hori ikaragarria litzateke. Lorena Berdunek baietz, berari ere izugarri gustatuko litzaiokeela ikusezin izatea, eta biak irudikatzen bezela ipini ziren, begirada galduta, halako trantze batean, bakoitza auskalo ze egoeratan, biak irripar bihurri berberaz... ____ Neuk ere ipini nuen momentu batez nere burua ahalmen horren jabe, eta haiei ez bezela, neri ez zidan graziarik egin ideiak. Ikusezin izan? Nahi dezun tokian izan, eta isilean, nahi dezun guzti hura ikusi? Nahi dezun guztiaren berri izan? Gauza aspergarriagorik! Itzalean dago xarma, edo argi ahularen baitan, edo iluntasun erabatekoan (irudimena hain gustora zilipurdikatzen dan eremu mugagabean...) Nobedadeak tira, baina ikusezin betirako? Esango nuke, Jaungoikoak IKARAGARRI aspertu behar duela hor goian (hemen behean). ____ ETBko buruzagiei sekula ez diegu barkatuko Mister Beanen bideoak hainnnnbestetan errepikatzea. Meritua dauka ordea gizonak, oraindik ere guri parre algara galantak erauzteko gauza da ta! Hau ikusi gabe neukan. Hona, gizon ikusezinarekin topo egin zuen egunekoa... ____ 2008/05/04 - 03:02:04
Artista jendearenak
Lorena Berdun , edo nola egin inori elkarrizketa borobil bat. Seguruasko sekreturik ez dago. Modua nabari-nabaria da, edozeinen bistan dago. Alkarrizketatzaileak, gonbidatuari itzalik egin gabe, noski, baina dosis txikitan, bere buruaz hitzegin behar du . "Eman" egiten du, eta hartara, alkarrizketatua, bera ere ematera "behartuta" sentitzen da. Hori pasa zitzaidan burutik, aurrekoan Lorenak Millan Salcedori egin zion alkarrizketa ederra, paregabea ikustean; baina akaso Millan Salcedo bezelako jendearekin baino ez du funtzionatzen. Tipo jatorra da Millan, eskuzabala, urrutitik antzematen zaio. Gauza mordoa geratu zitzaizkidan gogoan, baina lau baino ez ditut aipatuko. Hiru hemen, bat hurrengo mezuan. Bat, Kalean galdezka ibili ziren, ea zer iruditzen zitzaion jendeari Millan Salcedo. Erantzun guztiak sorta berekoak izan ziren, azkena ezik (juxtu hori nabarmendu nahi izan zuten nunbait): - Artista petoa, tipo alaia, baina... tristezia kutsu bat dariona. Egia gainera. Gizon honek gutxik bezela parre eragin digu, eta hala ere, gizon tristea dirudi. Nola leike? Hain gizon umoretsua, tristeziatik hurbil bizi da? Beharbada horrexegatik: tristeziatik ihes egiteko tranpolin gisa erabiltzen du umorea. Zenbat eta sakonago, orduan eta premia haundiagoa bertatik irtetzeko... Booooinnnnnnnnnnng......!! Bi, Katxondoa izatea ez dala errenta askotan, serio hitzegiten dezunean inork ez dizula sinisten. Nere burua ikusi nuen bapatean ispiluan. Neri ere askotan esan didate hori! (Hummm... Seriotu egin beharko dek pixkabat, Patxiiiii...) Hiru, Audientziaren zama. (biena, Lorenak ere aitortu zuen bere flakia gai honekiko). Urteberri eguneko showa egin eta, hurrengo egunean egunkaririk ez! Ezin jakin arrakastarik izan zuten ala ez. Ze itxoinaldi luzea, ze sufrimentua egun oso batez publikoaren erantzuna zein izan zan jakin gabe egon beharra... ... - Eta telebista zer, Millan? Ez al dezu telebistara itzuli behar? Antzerkia bakarrik? - Ezin det esan itzuliko ez naizenik, baina... Ez daukat gogorik. Egia esan, amorrugarria da oso, mimorik haundienarekin programa bat prestatu ondoren, Paquirrini brageta jetsi dion neskak zuk baino audientzia haundiagoa izatea. !! Telebistaren bidez miloika lagunengana iritsiko litzateke, baina nahiago du milaka gutxi batzuri plazer ematea. Ez da logikoa... Baldin eta, ez bada, artista gehienen harrak jaten duelako bera ere. Denetan nabarmenena izan nahiak. Bigarren izateak ez du balio. Zuzen ote nabil, Millan? ____ 2008/05/04 - 03:02:04
Atzamar puntak erre dizkidazu...
Idatzi, danok egiten degu. Testua edertu, oso lagun gutxik, eta testua edertzeaz gain zerbait jakingarria kontatu, askoz gutxiagok. Leire Bilbaok biak egiten ditu. Bai behintzat Sautrelakoek erakutsitako pasarte zoragarri honetan. Lagundu egingo zuten zalantzarik gabe musikak, irudiek; baina bere biluztasunean ere, hotzikara ederra pizteko modukoak dira bere hitz hauek. Neri behintzat piztu zidaten. ____ 2008/04/22 - 02:47:04
Eta bere iritzia zer?
Hainbesteko zalaparta emakumea dalako, haurdun dagoelako... Galdezka honi, galdezka hari, galdezka haruzko hari... Iritzia honek, iritzia horrek, iritzia haruzko hark... Eta bere iritzia jaso ez?? Baina baina... ____ 2008/04/19 - 02:43:06
Txikilikuatre, zatoz jada nigana
Chiquilicuatre bai, ala Chiquilicuatre ez? Hamakan orain honuntz, orain haruntz dabilenaren gisara, holaxe ibili naiz gaur, gustora oso nere hausnarrean, enperadore erromatarrarena eginez bukatzeko: Bai, ados. Enperadore erromatarretik gutxi dauka morroi honek, baina, ez baitet Chiquilicuatreren adinako tupedun enperadoreren argazkirik aurkitu sarean... BAI! Merezi du bizitzea Chiquilicuatrek. Merezi ditu aintza eta ospea... Eta euskalduna balitz, hobe! ____ Egiaren bila hasitako bidean, Markosekin gogoratu naiz oinak mugitzen hasi orduko, ezin bestela izan. Bere mezu honetan erakutsitako argibide honetaz: "Parmenidesek Sokrates gazteari aholkatu zion gauzarik xumeenak eta baztertuenak ez arbuiatzeko, esaterako zaborra." (jarraituko du...) ____ 2008/03/27 - 02:14:27
Bukatu esaldia
2008/03/19 - 02:01:14
Diseinu arazoak
Jun dan urtean jaso nuen egiarik potoloena. Kalakan izan zan, Koldo Goitiak bota zuen. Trafiko istripuetaz ari ziren, urtero izaten dan hildako mordoaz. Zergaitik hainbeste istripu, zer egin istripuak murrizteko, erantzunkizuna zeinena: gidariena, errepideena, trafiko zuzendaritzarena... Koldok hauxe bota zuenean: Eztabaida amaigabeetan milaka ordu pasako ditugu, oinarri-oinarrizkoa, begi-bistan daukaguna ikusi gabe, eta ikusten degunean, danok akats nagusia zein dan onartuta ere, erremediorik ipini gabe. .... Gure demokrazia sistimaren diseinu arazo larriez, akordatuko ote gera inoiz? (martxoak 9, Espainiako Gorte Nagusietarako hauteskunde egunean idatzia) ____ 2008/03/10 - 01:45:44
Hori da hori gerria mugitzea!
Malkoa dariola. Holaxe egon naiz gaur goizean, eta baita oraintxe ere, bideoari begira. Atzoko "Horrelakoa da bizitza" ren errepikapena ikusten, hori da hori lagunok, parre gustora egitea!! Kupela taldekoek diska berria atera dutela eta, bertan izan dira ba berau erakusten: "Kupela" kantuaren remix dantzagarri bat ere bai; erakutsi dute bideoa... Aiiiiii ze gozamena! Xaharren inguruan nola kiribiltzen diren bailarina batzuk, auskalo nundik ateratakoak: bixiak gero, karibearren batere inbidirik gabeak... Bukatu da bideoa eta, Andonik zer lortuko, platoan zeuden euskaldun batzuk dantzan jartzea! ... Hara! Nere herrikideak dira ta! Ikusi ondo bideoa: nahi adina ordu sartuko zituzten bideoko neska pinpirin hoiek gimnasioan, edo klase partikularretan; auskalo zenbat neke hartuko zuten, zenbat izerdi aterako zuten dantzan ikasten... Baina nere herrikideen aldean, kolorerik ez! Hori da hori lagunok gerria mugitzea!! Aupa Urretxu-Zumarraga!! ____ 2008/03/08 - 00:43:33
Umore saria 2007
Eta 2007ko umore saria... Esther Larraņaga, ingurugiro sailburuarentzat! ____ Bai, esango dezue berandu xamar nabilela, lehenago behar zuela hain sari garrantzitsua banatzea, baina... (jarraituko du...) ____ 2008/02/06 - 19:10:22
Orain Rolling-ak bezela... Edo.
Aritzek arrazoi. Berataz ari nintzen, Joxe Mari Iparragirre haundiaz Hona hemen berriz, Julenek idatzitako biografia bikaina . ____ Harrigarria da benetan Joxe Marik ze gora jo zuen, eta bere garaian izan zuen garrantzia. Galdera mordoa sortzen zaizkizu haren inguruan. Politena neretzako beharbada, Joxe Mariren izaera, benetan nolakoa ote zan gure Joxe Mari susmatzea. Nolakoa zan, eta nola erantzun zien bizitzak botatako enbido ugariei... Beste batean ekarriko det atzera zuen artera. Gaurkoan, xehetasun bat baino ez, neri atentzioa bereziki eman zidan txikikeria bat: "... Izan ere, garai hartako politikari batek adierazi zuen bezala, Iparragirreren kantaldi batera 6.000 pertsona inguratu ziren. Gipuzkoako mendiren batean egindako erromerian. Eta honek "Gernikako arbola" kantatzean (pasarte jakin batzuetan batez ere) jende hura guztia erotu egiten omen zen, besoak airera altxatuz eta Foruen alde heriotza emango zutela zin eginez. Testuinguru horretan agindu zuten Jose Mariren atxilotzea eta ondorengo erbesteratzea" .... Nere lagun Mikelekin alkartu nintzen atzo. Ezagutzen zuen liburua, eta baita datu hau ere, eta hauxe bota zuen: - 6000 lagun! Ba... Rolling-ak gaur egun bezela, hortxe nunbait. (!) Eta segituan nik: - Bai... Baldin eta, ez bazeuden orduan ere, gaur egun manifestapenen datuak biltzen dituzten sateliteak. Badakizu, ehun mila lagun bildutako tokian, miloi t'erdi ikusten dituzten hoiek... .... Gauean, begiak bildu aurretik, ohean nintzala, tin! Beste bonbilatxo bat ganbaran: - Bai, ta... 6000 lagun... Argi-indarrik gabe? Baflerik gabe? Zeinek kristo entzungo zion gizonari? Lehenengo ilarakoek? Eta haiek ere, danak isil-isilik zerbait entzungo bazuten... ____ 2008/01/24 - 05:55:22
