Mathiasen kopilotua
abenturak eta desbenturak
Bla bla bla eta xiki xiki
Jose Luis Uribarriren eta haren moduko nostalgikoen atsekaberako, Rodolfo Chikilicuatre izango da Espainiako ordezkaria Eurovision lehiaketan. Sekulako pelmada eman duten arren lortu dut ezinezkoa zirudiena: abestia ez entzutea. Hala ere, zaila da Rodolfori ihes egitea eta Buenafuenteren taldeari marketing operazio bikaina aitortu behar zaio. Konpetentziari, TVEri, gol bikaina sartu diote. Agian horregatik, herenegun, Club de fútbol saioan, tertuliano azaldu zen Rodolfo. Orain, Eurovision lehiaketarekiko interesa pizteko edo, Massielen La la la etorri zaigu berriro. Ustez, Francoren erregimenak presioa egin zuen 1968an Massielek irabazteko, Cliff Richard orduko Ingalaterrako ordezkariaren kaltetan (Francori indar gehiegi suposatzea da hori, ala?). Martitzenean Massielek bla bla bla jardun zuen Antena 3eko Espejo público saioan, Emilio Aragonen eta La Sextaren kontra sekulakoak eta bi esaten, polemika piztearren. Jesus Mariñas Massielen jenioa baretzen saiatu zen: ¡Tú ganaste por minifalda, por piernas y por coraje! . Guztion adostasuna ezinezkoa denez, telebista saioetan ohikoak bilakatu diren SMS maltzur horietako baten zera irakur zitekeen: Claro, cómo va a ganar con esa voz . ( Telebegi, Goienkaria) 2008/05/09 - 08:50:02
Gainsbourg gainbegiratuz (Live)
2008/05/01 - 14:10:01
Futbolmaniak
Futbol sasoi hobeak igartzen ditut faltan, Reala lehen mailan zirenekoak, telebistan saio hobeak ematen zituztenekoak. Estudio estadio aitzindari haren ondotik, 1990eko hamarkadan El día después , Canal Pluseko saio gogoangarri hura etorri zen. Zalantzarik gabe, futbolaren gaineko egin den saiorik onena, ikuspegi ezberdina ekarri zuena. Futbola gustuko ez zuten ikusleak ere erakartzea lortu zuten Michael Robinsonek eta konpainiak, analisia eta umorea uztartuz. Harrezkero etorri diren saioak, ahazteko modukoak. Zaila zeukaten arren, TVEn lortu dute El rondo baino programa txarragoa egitea; Club de fútbol horretan ere zarata da nagusi eta aurrekoan moduan, txisteak, sail ezberdinak eta analisten Ez, ez dira garai onak futbolzaleontzat: La Sextan, Andres Montes ; ETB, bigarren mailan; Teledonostin, Tito Irazustaren saio amaigabeak; Antena 3en Territorio Champions sufritu beharra daukagu; Telecinco, missing ; eta Cuatron ustezko umorista bikote hori, Los Manolos , auzoko tabernan egongo balira moduan komentarioak egiten dituzten horiek. ( Telebegi , Goienkaria) 2008/04/11 - 12:26:01
¡Hola!
2008/04/04 - 11:49:04
ZP vs. Rajoy: Pressing Catch motela
Harrigarria Zapateroren ( Vota con todas tus fuerzas leloa ez da eskatologiko samarra?) eta Rajoyren ( Con cabezón y coraza ) ditxosozko debateak izan duen audientzia: 13 milioi El Harrigarriagoa oraindik zer-nolako aurre eta post debateak izan ditugun. Analistoek bi hautagaien keinurik hutsalena ere aztertu dute, baina debateak aspergarriak izan dira, bizitasun gutxikoak, etengabe entzundako argumentuekin. 50 baldintza adostu omen dituzte alde bateko eta besteko aholkulariek (haien ikasgaia buruz ikastera mugatzen diren ikastunak dira hautagaiak?): 21 graduko tenperatura estudioan, aulkiak ez dakit zelakoak, plano hau bai eta beste hori ez, kronometratzaile ofizialak eta Manuel Campo Vidal eta Olga Viza zeremonia-maisu mutu gisa (noizean behin ikasleei isiltzeko agintzeko, besterik ez). Bai, dena lotuegia eta inprobisaziorako tarterik ez. Zera falta izan da bakarrik: poligrafoaren erabilera; buruko eskanerra aurkariaz benetan zer pentsatzen duten ezagutze aldera; lo geratu diren ikusleak zenbatzea; eta, azkenik, dopinaren aurkako kontrola eta House doktorearen diagnostikoa, ZP ( Gabon eta zorte on ) eta Rajoy ( Mi niña en el país de las maravillas ) tipo fidagarriak diren jakiteko. ( Telebegi , Goienkaria) 2008/03/07 - 15:44:08
Zorakeri dibertigarria
Fedearen eta kreditu txartelen antzera, umorea kontu pertsonala eta besterezina da. Barrea kutsakorra ere bada; halere, gerta daiteke norbera barrez lehertzen egon eta albokoak hienaren rictusa erakustea (edo aldrebes). Telebistaren helburu sanoetako bat badirudi barrea piztea dela, nahiz eta askotan emaitza hutsaren hurrengo izan. Eguazten gauean zorakeri dibertigarri batekin topo egin nuen, TVE-2an: Muchachada Nui , Joaquin Reyesen saioa, aurretik Paramount Comedy katean ikus zitekeen La hora chanante -ren jarraipena. Estetika ederrarekin eta elkarrizketa eta egoera absurdoekin, momentu paregabeak ditu: Tita Cervera eta Rocotocloc, La leyenda de perro muchacho, Enjuto Mujamuto, El Bonico (del tó), Los Klamstein marrazki bizidunak... Felix Linaresek zera frogatu zuen martitzenean: Francoren sasoian jatorrizko elkarrizketak aldatzen zituztela zentsoreek sarritan ( Casablanca edo La dama de Sanghai filmak ekarri zituen gogora; Bogarten eta Orson Wellesen pertsonaiak Francoren etsaiak ziren zentsuraren galbahetik pasa aurretik). Oraingo errekurtsoetako bat ( Muchachada -ko Mundo viejuno sailean moduan) zera da: antzinako irudiei (eta Franco berari, Noche Hachen ) elkarrizketa zoroak gehitzea. Eskerrak Francok ez duen burua altxatuko. (Goienkaria, Telebegi ) 2008/01/17 - 15:46:05
Mesedez, Milá
Aspaldian telebista gutxi ikusi dut eta, beraz, zutabe hau egitea tokatzen zaidanez, atrebentzia gehiegi ez bada, saioa ikusi gabe egingo dut, behingoagatik. Zappingetan ikusitakoa, han eta hemen irakurritakoa (gutxi) eta lagunengandik iristen zaidana (are gutxiago) oinarri hartuko dut GHren 9. ekitaldia komentatzeko. Mercedes Milák jarraitzen du saioaren gidaritzan, nola ez; nik uste dut bere frustraziorik handienetakoa aurkezten duen programako lehiakide bat ez izatea dela. Badirudi kondenatua dagoela aurkeztera eta, ondorioz, lehiakideak zein ikusleak haren gorabeherak jasatera. Bere umorea neurtzeko tresna baliagarria da Miláren orrazkera. Ilea goruntz, tente jarri badiote, adios! Aurreko baten Pocholoren antza hartu nion. Esperimentu soziologiko gisa saldu ziguten hasieratik GH, Eduard Punsetek egindako ikerketa sakona balitz. Baina zein da GHren ekarpena? Edredoning delakoa? Lehiakideen manien harira, Milák berak zera aitortu zuen behin: dutxara doanean txiza egitea gustuko duela. Kantu apropos baten laguntzaz, ez litzateke saioaren amaiera zoragarria izango Milá horrela agertzea? ( Telebegi , GOIENKARIA) 2008/01/17 - 15:46:03
Keak eraman zuen legea
Urtarrilean bi urte beteko dira tabakoaren aurkako legea indarrean jarri zenetik. Bazirudien ke arteko egunak bukatu egingo zirela edo, gutxienez, erretzaileendako gune bereziak ondo mugatuko zituztela han eta hemen. Baina neurri handi batean ez da holakorik gertatu, gure inguruan behinik behin. Ustez erretzea debekatua dagoen hainbat tokitan jendeak lasai asko erretzen du oraindik. Domekan, esaterako, Astelenan izan ginen eta zer zen hura, laletxe ! Barriola ... eta behe lainoa nagusi Eibarko pilotalekuan. Antza, Europako beste zenbait herrialdetan zorrotzago jokatu dute legea aplikatzeko orduan, baina hemen nahasmena da nagusi, eta inork ez du erantzukizuna hartzen (bitartean, Alderdien Legea bezalako zentzugabekeriarekin galtzen ditugu indarrak eta denbora). Erretzen ez dugunok lehengo antzera jarraitzen dugu. Panorama beltz honen aurrean, gure alkate Agurne Barrusok ikasbide ona ematen digu: Bergarako udaletxe kanpoaldean ikusi izan dut behin baino gehiagotan Agurne zigarroa erretzen. Ziur naiz momentu bizioso horiek aproposak direla gauzak argitzeko eta erabakiak hartzeko. Batzutan ez dago txarto gure agintarien jokabidea jarraitzea. ( Usteak uste , Goienkaria) 2008/01/17 - 15:46:03
Amaxofobia eta mirari txikiak
Aspalditik autoa gidatzeari beldurra edo fobia dion lagun bat daukat. Eta amaxofobia sufritzen duen neska bat izan zen Zeure esku (ETB-1, martitzen gauetan) saio berriko lehen protagonista. Argi dago saioak gidatzeari ez diola inolako fobiarik Klaudio Landak eta bera dugu saioko aurkezlea. Garai bateko estilo zoro eta oihukari hura alde batera lagata, serioago agertzen zaigu orain. Amaxofobiaren gaineko hainbat datu eta azalpen eman ostean, berak aurkeztu zigun Jaurne zornotzarraren kasua, eta bien bitartean hainbat mezu larri azaltzen ziren pantailan, letra larriz: Ezin du kotxea bakarrik hartu , Berandu iristen da , Denbora asko galtzen du , Familiak ez du ulertzen edo Besteen menpe bizi da . "Ai ama! Felix Linaresen eskua hemen?", pentsatu nuen. Zailtasunak zailtasun, Mikel Elizondo psikologoaren eta Ander Vilariño pilotuaren gomendioei eta senarraren animuei esker bere fobia gainditu omen zuen Jaurnek. Hori frogatzeko Urkiolaraino joan zen autoan. Ondo legoke Jaurniren ibilbideari jarraipena egitea hurrengo baten, express soluzioa fidagarria den frogatzeko. Edozein modutan, nork esan zuen telebistak zerbitzu publikoa eskaintzen ez duenik? Ea zer nolako mirari txikiak aurkezten dizkiguten aurrerantzean. (Goienkaria, Telebegi ) 2008/01/17 - 15:46:02
Gertuko familia bat
Tarteka ikusi arren, Simpsondarren gorabeheren berri izaten dut lagun ba(r)ti esker: bizitzako edozein gertakariren aurrean, haien pasadizoren bat ekartzen du gogora, barre artean. Zenbait kapitulu horrenbeste aldiz errepikatu ostean, elkarrizketak buruz dakizki honezkero. Garai bateko filosofoen lekua hartu dute Homerrek-eta lagunarengan. Ez da lezio txarra. Marrazki bizidunetan aro berri bat inauguratu zuen telesailak 18. denboraldia bete du dagoeneko. Marrazki zoragarriak, gidoi garratzak, errealitateari eta fikzioari erreferentzia etengabeak, pertsonaia gogoangarriak (zaila da gero bakarrarekin geratzea!) edo hainbat taburen (familiarena tartean) errebisio maltzurra dira telesailaren markak. Gaur, benetan famatua izatera iristeko Paris Hiltonekin ez, Simpsondarren kapituluren baten irten beharra dago. Euskaldunik aterako da inoiz? Nor izango da lehena? Martin Zabaletaren lorpenaren parekoa litzateke. Moeren tabernan apustuak egin daitezke. Bien bitartean, gorriz markatuta daukat uztailaren 27a, egun horretan estreinatzen delako Los Simpsons: la película ... eta oporrak hartzen ditugulako baita. ( Telebegi , Goienkaria) 2008/01/17 - 15:46:01
