Hitz beste

Lehengo batez, etxera gentozela, bi bikote ikusi genituen, hogeita hamar urteren bueltakoak, hondartzako trepetekin. Jardun zalapartatsua zeramaten, eta harrapatu genizkien solastxoen arabera, hartu berri zuten apartamendu bat egun batzuetarako. Mutiletako batek ordenagailua ekarri zuela esan zuen; nesketako bati ba nik liburu bat ekarri dut atera zitzaion. Esateko moduagatik ez zirudien oso irakur zalea liburua ekarrita balentria bat egin zuela ematen zuen , baina mutiletako baten erantzunarekin gelditu ginen gu: Ondo etorriko zaigun salako mahaia orekatzeko. Pasadizoak asmatua ematen du. Ez da. Baina hala balitz ere: iraila arte agur esateko balio dit anekdotak. Ez dut oporrik imajinatzen libururik gabe, eta aldean izango ditut bakarren batzuk. Kontsolamendu handia da: goazen tokian mahai herrenen bat suertatzen bazaigu, beti izango dugu neurri-neurriko libururen bat orekari eusteko. 2010/08/02 - 09:52:05

Ole!

Bera eroriko dek, ez akiok bultza kantatu zuen Txirritak, eta zezenketen polemikan parte hartu duen makina bati ondo etorriko zitzaizkion Txirritaren bertsoak Txirritaren bertsoak ezagutu izan balitu. Zezen-festa bera eta berez eroriko omen da, hori dio zezenketaren kontra egon arren debekuarekin ados ez dagoen askok. Berez erortzen utzi? Txirritaren bertsoan pareta ziztrin bat zen berez eroriko zena. Ez du garrantzirik, utzi bakean, laster joko du behea. Baina, badaezpada ere, ez ibili paretaren inguruan; ez pasatu paretik, paretak azpian harrapa ez zaitzan. Hala ere, eta abisuak abisu: Txirritaren paretak azpian harrapatuko bagintu, salaketa jarriko genuke Dagokion jaunaren leihatilan. Gaizki dagoena berez erori zain gelditzea, oker handia. Zezenketak gaizki dauden da auzia. Eta gaizki baldin badaude, Txirritak esango du nahi duena, baina ez dago zuzen zezen bakar baten sufrimendua. 2010/07/30 - 10:28:03

Inpresioa

Gehienera ere, azken hogeita hamar urte hauetan hartutako neurriak mantendu. Aukeran, ordea, nahiago neurriok errebisatu. Edo berrogeialdian jarri. Edo frenatu eta dezeleratu. Edo murriztu, inausi, indargabetu. Edo atzera bota. Iniziatiba positibo berri eraginkorrik, ordea, bakar bat ere ez. Ez dirudi zerbaiten alde egoteko modurik logikoena denik. Inpresio horixe gelditzen zait sozialistek euskararen inguruan hartzen ari diren neurri gehienekin. Ematen du asko dutela kritikatzeko eta kimatzeko. Deus gutxi, ordea, eskaintzeko, euskararen aldeko apustu efektiboak plazaratzeko. Beste modu batera esanda: defentsiban daude. Balirudike gaztelaniaren etorkizuna dutela kezka, eta ez euskararena. Balirudike gaztelania dela normaltasuna; euskara, aldiz, elkarbizitza linguistikoa desorekatzen duen anomalia. Aldeko iniziatiba orijinal bat, beren hausnarretik sortua, ezagutu nahi nuke. 2010/07/29 - 09:19:02

Hortzak izerditan

2010/07/29 - 09:19:02

Durundia

Ez geneukan Bremen non zegoen jakin beharrik, lau animalia musikariek Bremenera (hirira, mundura, bizitza hobeago batera) joan nahi zutela jakiteko. Ez genekien Thule existitzen zen ala ez, baina maparen oso goian, izotzaren lurraldeetan, kokatzen genuen. Sargazoak, Patagonia, Baskerville, Kilimanjaro, Tonbuktu, Mompracem Bost axola zigun lekuok mapetan zeuden ala ez. Izenek izenen durundiak gure irudimenaren mapa marrazten zuten eta aski zitzaigun hori mundua ulertzen hasteko. Bazeuden beste izen batzuk ere, egunkarietako albisteetan agertzen zirenak: Treblinka, Korea, Algeria, Shangai Haiek ere izen durunditsuak ziren, baina bizkarra erakusten genien: nagusien arteko liskarren eta haien auzien islak ziren. Egunotako periodikoek aspaldi entzun gabeko izen durunditsu bat dakarte ostera ere: Darfur. Baina albiste faltak eta ez kontzientziak bihurtu du oinaze ahaztu bat albiste. 2010/07/28 - 10:08:04

Onkeria garaile

2010/07/27 - 10:59:02

Kosovo

Hagako auzitegiak Kosovoren independentzia bermatu du. Legezkotzat jo du Kosovoko parlamentuak 2008an hartutako erabakia, Nazioarteko tribunalak esan du ez dagoela legerik independentziaren aldarrikapena debeka lezakeenik. Hagako ebazpenaren ondoren, Washingtonek animuak eman dizkio Espainiako gobernuari Kosovo onar dezan: Adi eta erne, zabiltzate bizkor, horrek ez dik-eta atzera bueltarik. Ez du atzera bueltarik, Europa aldatu egin da. Baina Espainia, ez. Espainia beldur da kanpoko usoa onartuta etxeko otsoak ez ote zaizkion oldartuko. Ez, ez du Kosovo onartuko. Akats larria. Kosovo onartuko balu, Zapaterok esan dezake Kosovoko kasua eta Espainiako balizkoak Euskal Herria eta Katalunia ez direla berdinak. Aldiz, Kosovo onartu gabe, argumentuak oparitzen segituko dute: Ikusten? Guri ate guztiak ixteagatik ez dute Kosovo onartzen! . Kosovon piztutako kriseiluak luzaz segituko argi egiten hemen. 2010/07/25 - 12:36:03

Loturak

2010/07/23 - 20:05:06

Iturriak