Aramaio - Albisteak - Goiena.net

Aramaioko igerilekuan gaztetxo ugari dabil

Euriak eta lainoek tregua piska bat eman digute azken egunotan eta debagoiendarrak igerilekura edota hondartzara joateko aprobetxatu dute. Aramaion, esaterako, gaztetxoendako igerileku irekia jarri dute lehen aldiz eta gazte ugari ikusi ditugu igerilekuaren inguruan. Ondo baino hobeto ibili direla azaldu digute.  2010/08/20 - 21:04:03

Andres Osinaga hil egin da astean

Gaixotasun luze baten ondoren hil zen asteartean Osinaga Gasteizen, 62 urte zituela. Aramaioko Udaletxean EAko zinegotzia zen.  2010/08/19 - 21:08:03

ESAITek antolatutako mendi martxa Aramaion izan zen egubakoitzean

Egubakoitzean Aramaiora iritsi zen Esaitek antolatutako mendi martxa. Uztaritzen hasi zuten ibilaldia uztailaren 31n; eta, eguaztenean Elgetatik pasa ondoren, egubakoitzean Aramaiora iritsi ziren. Han, ongietorria egin zieten, eta ondoren, herri afaria izan zuten. Udaleko ordezkariak arduratu ziren afaria prestatzeaz. Pasta entsalada eta oilaskoak izan zituzten; ondoren, gazta eta kafea guztiendako. 80 lagun inguru batu ziren afaritarako.  2010/08/09 - 21:51:01

Suña eta Untzilla arteko errepide zatia konpontzen hasiko dira

Datorren astelehenean, abuztuak 2, Suña eta Untzilla arteko errepide zatia konpontzen hasiko dira. Ondorioz, zati hau trafikora itxi egingo da eta Arrasatera joateko Aretxabaletatik joan beharko da.  2010/07/28 - 22:42:02

Elkarretaratzea egin dute errepidearen egoera salatzeko

Aramaioarrek elkarretaratzea egin dute gaur goizean Arabako Diputazioaren aurrean, errepidea dela-eta protesta egiteko. 09:30ean elkartuko dira herriko kiroldegiaren aurrean, eta handik Gasteizerantz abiatu dira. Ordubete beranduago, 'Aramaixo isolaturik, Aldundia errudun' lelopean, ehun lagun inguru batu dira Diputazioko plazan.  2010/07/27 - 22:46:03

Berrikuntza barik, irailean jokatuko dute Aramaioko IX. Rallysprinta

Irailaren 11n jokatuko dute Aramaioko IX. Rallysprinta. Hilabete eta erdi falta da, baina dagoeneko antolatzaileak hasi dira proba prestatzen. Ibarran hasita, Etxaguenetik Gantzagara egingo dute helmugara heltzeko. Errepidea 14:30ean itxiko dute, eta ordu bete beranduago hasiko dute proba.  2010/07/27 - 22:46:03

Igerilekua Bañera parkean

Aramaioko Udalak igerilekua jarri du Bañera parkean, 13 urtetik beherako umeek bertan ondo pasa dezaten. 6 urtetik beherako umeek heldu batek lagunduta sartu ahal izango dira.  2010/07/26 - 22:50:05

Errepidearen arazoari konponbidea eskatzeko mozioa onartu du Udalak aho batez

Sei hilabete pasa dira Arrasate eta Aramaio arteko bidean lur-jausia gertatu zenetik, eta orduz geroztik, itxita dago errepidea. Egoera hau dela eta, eta azken hilabeteotan Aldundiarekin izandako bilerek fruiturik eman ez dutela ikusita, ezohiko osoko bilkura egin zuten udaletxean. Bertan, aho batez onartu zuten konponbideak eskatzeko aurkeztutako mozioa.  2010/07/22 - 23:07:04

Ezohiko osoko bilkura Aramaio-Arrasate errepideari buruz

AHT eraikitzeko obren ondorioz, duela 5 hilabete itxi zuten Arrasate eta Aramaio arteko errepide nagusia. Egoerari irtenbide egoki bat bilatu nahian, orain arte egindakoak eta zein pausu eman beharko diren aztertzeko ezohiko osoko bilkura egingo dute udaletxean.  2010/07/19 - 23:20:01

Jon Agirre ospitaletik espetxera eraman dute

Jon Agirre euskal preso aramaioarra Basauriko espetxera eraman dute berriro, Basurtoko ospitalean egon ostean. Amnistiaren Aldeko Mugimenduak jakinarazi duenez atzo bukatu zuen tratamendua Agirrek eta orain jarraipena kartzelan egingo diotela esan diote. Infekzio bat izan du Agirrek.  2010/07/17 - 23:27:06